Umabot na sa 85 barangay sa Occidental Mindoro, Oriental Mindoro at Romblon ang naapektuhan ng pagbaha dulot ng Habagat, ayon sa Department of Social Welfare and Development (DSWD) MIMAROPA.
Batay sa ulat ngg Disaster Response Management Division (DRMD) ng DSWD MIMAROPA na inilabas alas-4:00 ng madaling araw ngayong Agosto 9, nasa 5,836 pamilya o 25,870 indibidwal ang apektado ng pagbaha sa tatlong lalawigan.
Sa naturang bilang, 287 pamilya o 984 indibidwal ang nasa 32 evacuation centers, habang 288 pamilya o 793 indibidwal ang nakikitira sa kanilang mga kamag-anak o kaibigan.
Naitala rin ang isang totally damaged na bahay at 22 bahagyang napinsalang bahay dahil sa epekto ng pagbaha.
Samantala, nagsimula na ang DSWD MIMAROPA sa pamamahagi ng assistance sa mga residenteng naapektuhan ng kalamidad.
May natitira pang ₱175.02 milyon na pondo at relief resources ang ahensya para sa patuloy na pagtugon sa pangangailangan ng mga apektadong komunidad. Kabilang dito ang ₱2.067 milyon na Quick Response Fund (QRF) at ₱172.95 milyon na halaga ng pagkain at iba pang food items.
Patuloy ang assessment at validation ng DSWD upang matukoy ang pangangailangan ng mga apektadong pamilya at matiyak ang agarang paghahatid ng angkop na tulong.
Nakikipagtulungan naman ang DSWD MIMAROPA Quick Response Team sa mga lokal na pamahalaan para sa mabilis na pagresponde at paghahatid ng humanitarian assistance sa mga komunidad na apektado ng pagbaha.
Discussion about this post