Pormal na isinumite sa Department of Environment and Natural Resources (DENR) ang humigit-kumulang 31,000 lagda mula sa Romblon bilang suporta sa panawagang protektahan ang Sibuyan Island laban sa malakihang metallic mining at aksyunan ang nakabinbing petisyon para sa kanselasyon ng mining agreement ng Altai Philippines Mining Corporation (APMC).
Personal na tinanggap ni DENR Secretary Juan Miguel Cuna ang mga lagda na ibinigay ng isang delegasyon mula sa Romblon.
Sa kabuuang bilang, 27,000 lagda ang nagmula sa Sibuyan Island, na katumbas umano ng tinatayang 77 porsiyento ng voting population ng isla, habang karagdagang 4,000 lagda ang nagmula sa Tablas Island.
Pinangunahan ni Romblon Governor Trina Firmalo-Fabic, Sangguniang Panlalawigan Member Cary Falculan, at San Fernando Mayor Fernando Marin ang pagsusumite ng mga lagda, kasama ang mga kinatawan ng Bayay Sibuyanon Inc., Sibuyanons Against Mining, Bantay ng Kalikasan ng Sibuyan, Nature Ambassadors of Sibuyan at Alyansa Tigil Mina.
Kasabay ding isinumite ang mga resolusyon at iba pang opisyal na aksyon mula sa Sangguniang Panlalawigan ng Romblon, Sangguniang Bayan ng San Fernando, at mga lokal na pamahalaan ng Banton, Concepcion at Odiongan, gayundin mula sa Barangays Taclobo at España.
Nagpahayag din ng suporta ang iba't ibang faith-based groups at organisasyon, kabilang ang Romblon Ecumenical Forum Against Mining, Iglesia Filipina Independiente Diocese of Odiongan, Clergy of the Diocese of Romblon at Romblon Diocesan Council of the Laity.
Kabilang din sa mga isinumite ang mga pahayag ng suporta mula sa mga diyosesis sa mga lalawigang nakapalibot sa Sibuyan, na kumakatawan umano sa tinatayang 9.6 milyong Katoliko.
Nanawagan ang delegasyon sa DENR na aksyunan ang nakabinbing petisyon para sa kanselasyon ng MPSA No. 304-2009-IVB ng APMC, na kanilang iniuugnay sa pangangalaga sa biodiversity, watershed at iba pang likas na yaman ng Sibuyan Island.
Ayon sa mga grupo, ang pagsusumite ng mga lagda ay pagpapatuloy ng matagal nang panawagan laban sa pagmimina sa lalawigan. Noong 2012, tinatayang 128,346 lagda mula sa iba't ibang bahagi ng Romblon ang naipasa rin sa DENR kaugnay ng mga panawagan para sa pangangalaga ng mga isla at likas na yaman ng lalawigan.
