Nagpahayag ng matinding pagkabahala ang U.P. Mountaineers sa ipinanukalang operasyon ng Altai Philippines Mining Corporation sa Sibuyan Island, na anila'y maaaring magdulot ng negatibong epekto sa mga mamamayan, kalikasan, at natatanging biodiversity ng isla.
Sa isang pahayag, sinabi ng organisasyon na may natatanging ugnayan ito sa Sibuyan Island, partikular sa Mt. Guiting-Guiting, na isa sa mga kinikilalang bundok sa bansa at may mahalagang bahagi sa kasaysayan ng U.P. Mountaineers.
Ayon sa grupo, matagal na silang nakikipagtulungan sa mga Sibuyanon upang isulong ang responsableng pamumundok at pangalagaan ang likas na yaman ng isla.
Binigyang-diin din ng U.P. Mountaineers na kinikilala ng iba't ibang siyentipikong pag-aaral ang Sibuyan bilang isang Key Biodiversity Area na may pandaigdigang kahalagahan dahil sa mga natatangi at endemic na uri ng halaman at hayop na matatagpuan lamang sa isla.
Ayon sa organisasyon, ang mga kagubatan ng Sibuyan ang nagsisilbing pundasyon ng kabuhayan at kalidad ng pamumuhay ng mga residente, na maaaring malagay sa panganib kung matutuloy ang pagmimina.
Bagama't kinikilala nila ang layunin ng paglikha ng kabuhayan at pagpapabuti ng kalagayang pang-ekonomiya, iginiit ng grupo na hindi ito dapat isakatuparan kapalit ng pagkasira ng likas na yaman at kapakanan ng mga komunidad sa Sibuyan.
Sa pagtatapos ng kanilang pahayag, nagpahayag ng pakikiisa ang U.P. Mountaineers sa panawagan ng mga residente ng Sibuyan na pangalagaan ang kanilang isla at mapanatili ang likas na pamana nito para sa susunod na mga henerasyon.
Discussion about this post