Opisyal nang nakumpirma ang kauna-unahang naitalang King Cobra (Ophiophagus sp.) sa Tablas Island, ayon sa isinagawang pagsusuri ng mga eksperto sa ahas na nahuli sa Sitio Siok, Brgy. Libertad, Odiongan noong July 21.
Ayon kay Odiongan Municipal Environment and Natural Resources Office (MENRO) Officer Raymund Inocencio, bagama't may naunang tala ng King Cobra sa Romblon Island noong 2013, ito ang unang pormal na kumpirmasyon ng presensya nito sa Tablas Island.
Kinilala ang ahas bilang King Cobra matapos itong suriin nina Inocencio, Jimmy Tan, at herpetologist na si Emerson Sy.
Ayon sa mga eksperto, nakumpirma ang pagkakakilanlan nito batay sa natatanging occipital scale na matatagpuan sa ulo ng ahas.
Ipinaliwanag din na ginagamit sa kasalukuyan ang scientific name na Ophiophagus sp. para sa mga King Cobra na natatagpuan sa Tablas at Romblon dahil patuloy pang pinag-aaralan ang eksaktong species nito. Ang dating tawag na Ophiophagus hannah ay hindi na ang kasalukuyang ginagamit na pangalan sa umiiral na klasipikasyon.
Kasabay nito, nagbabala si Sy sa publiko na maging maingat lalo na ngayong buwan ng Hulyo, na panahon ng pagpisa ng mga itlog ng King Cobra.
Aniya, naiiba ang kulay at pattern ng mga bagong pisang King Cobra kumpara sa mga nasa hustong gulang kaya maaari silang mapagkamalang ibang uri ng ahas. Gayunman, kahit bagong pisa pa lamang ay taglay na ng mga ito ang makapangyarihang kamandag.
Pinayuhan ang publiko na huwag lalapitan, hahawakan, o susubukang hulihin ang anumang ahas o maging ang mga natatagpuang balat o shell ng itlog nito. Sa halip, agad na ipagbigay-alam ang anumang sighting sa kanilang barangay o sa MENRO upang ligtas itong maasikaso ng mga awtoridad.
Nanawagan din ang mga eksperto sa mga residente na maging mapagmatyag at iwasang gambalain ang wildlife upang maiwasan ang anumang insidente at mapanatili ang kaligtasan ng tao at ng mga hayop.
Discussion about this post