Pangungunahan ng lalawigan ng Romblon ang pagdaraos ng 2026 Regional Science, Technology, and Innovation Week (RSTW) sa MIMAROPA bilang host province at central hub ng kauna-unahang sabayang pagdiriwang sa limang lalawigan ng rehiyon mula August 17 hanggang 19, 2026.
Ayon sa Department of Science and Technology (DOST)-MIMAROPA, isasagawa ngayong taon ang RSTW sa pamamagitan ng multi-island implementation approach, kung saan magkakaroon ng magkakasabay na aktibidad sa Romblon, Occidental Mindoro, Oriental Mindoro, Marinduque, at Palawan upang mas mailapit ang agham, teknolohiya, at inobasyon sa publiko.
Ang RSTW ay ang panrehiyong bersyon ng National Science and Technology Week (NSTW) at nagsisilbing plataporma upang maipakita ang mga programa, serbisyo, teknolohiya, at inobasyon ng DOST, gayundin ang pagpapalawak ng pagpapahalaga ng publiko sa science, technology, and innovation.
Bitbit ng pagdiriwang ang temang “Siyensya, Teknolohiya, at Inobasyon: Kabalikat sa Matatag, Maginhawa, at Panatag na Kinabukasan,” at ang regional sub-theme na “Science, Technology, and Digital Innovation: Driving Food Security, Sustainable Energy, and National Resilience.”
Magkakaroon ang bawat lalawigan ng mga aktibidad na sumasalamin sa kanilang kultura, tradisyon, lokal na pagkakakilanlan, at ambag sa kaunlaran ng rehiyon, bilang pagpapakita na ang siyensya, teknolohiya, at inobasyon ay naaabot ng lahat ng MIMAROPAns sa kabila ng heograpikal na pagkakahiwalay ng mga isla.
Discussion about this post