Tinuruan ng wastong nutrisyon, meal planning, at iba pang kaalamang pangkalusugan ang mga senior citizen sa Odiongan bilang bahagi ng pagdiriwang ng Nutrition Month 2026.
Pormal na inilunsad noong July 9 sa tanggapan ng Office of the Senior Citizens Affairs (OSCA) ang programa na naglalayong palakasin ang kaalaman ng mga nakatatanda sa tamang nutrisyon at pangangalaga sa kanilang kalusugan.
Pinangunahan ang aktibidad ng Office of the Senior Citizens Affairs (OSCA), Municipal Nutrition Action Office (MNAO), at Rural Health Unit (RHU) sa ilalim ng temang “Nutrisyon at Kalikasan, Ating Pangalagaan.”
Kabilang sa mga isinagawa ang Nutrition Education Lectures at meal planning upang gabayan ang mga senior citizen sa pagpili at paghahanda ng masustansyang pagkain na angkop sa kanilang edad at kalusugan.
Namahagi rin ang Odiongan Nutrition Office ng Information, Education, and Communication (IEC) materials tungkol sa Pinggang Pinoy, gayundin ng mga multivitamins para sa mga kalahok.
Ayon sa mga organizer, layunin ng programa na mahikayat ang mga senior citizen na magkaroon ng mas malusog na pamumuhay sa pamamagitan ng wastong pagkain at tamang pangangalaga sa kalusugan. Bahagi rin ito ng patuloy na pagtutulungan ng MNAO, OSCA, RHU, at Pamahalaang Lokal ng Odiongan sa pagpapatupad ng mga programang nagtataguyod ng kapakanan ng mga nakatatanda.
Discussion about this post