Sugatan ang isang agent ng Philippine Drug Enforcement Agency (PDEA) matapos tamaan ng bala sa isang insidente ng accidental firing sa Purok Looban, Barangay Dapawan, Odiongan bandang 3:45 ng hapon noong July 13.
Batay sa inisyal na imbestigasyon, hinahawakan ng isang PDEA agent ang kanyang issued firearm upang ilagay ito sa ligtas na lugar nang aksidente itong pumutok at tumama sa kisame ng bahay.
Sa pagtatangkang kunin ng isa pang PDEA agent ang baril upang maiwasan ang posibleng karagdagang panganib, muli itong aksidenteng pumutok at tinamaan ang kanyang kaliwang paa.
Agad na isinugod ang sugatang PDEA agent sa Romblon Provincial Hospital upang mabigyan ng kinakailangang medikal na atensyon.
Agad namang rumesponde sa insidente ang mga tauhan ng Odiongan Municipal Police Station at nakipag-ugnayan sa Scene of the Crime Operatives (SOCO) para sa masusing pagproseso ng pinangyarihan. Narekober sa lugar ang isang caliber .45 Jericho 941 FS pistol, isang magazine na may 10 live rounds, dalawang basyo ng bala, at dalawang fired slugs.
Ang PDEA agent na may hawak ng baril ay kasalukuyang nasa kustodiya ng Odiongan MPS. Posible itong maharap sa kasong Reckless Imprudence Resulting in Physical Injury.
