Binisita at pinarangalan ni Pangulong Ferdinand R. Marcos Jr. nitong Huwebes ang dalawang sugatang tauhan ng Philippine Navy na nasugatan sa naganap na agresibong insidente sa Ayungin Shoal sa West Philippine Sea noong Hulyo 20.
Sa kanyang pagbisita sa Camp Ricarte Station Hospital sa loob ng Western Command (WESCOM) Headquarters, personal na kinumusta ng Pangulo ang kalagayan nina Seaman First Class Underwater Operator (S1UO) Carmelo J. Aballe, 33, at Private (Pvt.) Eric B. Lacida, 24, na parehong nasugatan habang nakatalaga sa BRP Sierra Madre.
Nagkamo si Aballe ng pinsala sa ulo na kinailangang tahiin ng apat na stitches at nananatiling nasa matatag na kondisyon habang patuloy na mino-monitor ng mga doktor. Samantala, nagtamo naman si Lacida ng bahagyang gasgas sa kamay at nasa maayos ding kalagayan.
Bilang pagkilala sa kanilang katapangan at dedikasyon sa pagtatanggol sa soberanya ng bansa, iginawad ni Pangulong Marcos sa dalawang sundalo ang Order of Lapu-Lapu.
Nagkaloob din ang Pangulo ng tig-₱100,000 Special Financial Assistance (SFA) kina Aballe at Lacida bilang karagdagang suporta sa kanila.
Ayon sa Malacañang, hiwalay ang naturang financial assistance sa mga benepisyong maaaring matanggap ng mga sundalo sa ilalim ng Comprehensive Social Benefits Program (CSBP) ng Armed Forces of the Philippines (AFP).
Muling kinilala ng Pangulo ang katapangan at sakripisyo ng mga tauhan ng Philippine Navy sa patuloy na pagtatanggol sa teritoryo at soberanya ng Pilipinas sa West Philippine Sea.
