Pinangunahan ni Pangulong Ferdinand R. Marcos Jr. ang pamamahagi ng rice assistance sa 16,000 benepisyaryo sa Puerto Princesa City sa ilalim ng Bagong Pilipinas, Bawat Bayan Makikinabang campaign nitong Huwebes.
Isinagawa ang pamamahagi sa Edward Hagedorn Coliseum bilang bahagi ng mga aktibidad ng Pangulo sa Palawan. Katuwang niya sina Puerto Princesa City Mayor Lucilo “Cecil” Bayron, 2nd District Representative Jose Chaves Alvarez, at 3rd District Representative Gil “Kabarangay Jr.” Acosta.
Pinopondohan ang programa sa pamamagitan ng Local Government Support Fund (LGSF), na layong mapabilis ang paghahatid ng mga serbisyo ng mga lokal na pamahalaan sa kanilang mga nasasakupan.
Ayon kay Pangulong Marcos, binago ng administrasyon ang sistema ng LGSF upang maging mas mabilis at mas episyente ang pagbibigay ng tulong sa mga mamamayan sa pamamagitan ng pagbibigay ng mas malaking papel sa mga lokal na pamahalaan.
“Aayusin ko at gagawin nating maganda ang sistema sa LGSF. Ang LGSF ay talaga para sa local government,” ani ng Pangulo.
Ipinaliwanag niya na sa halip na ang pambansang pamahalaan ang direktang magpatupad ng mga programa, ang mga lokal na pamahalaan na ang tutukoy sa mga benepisyaryo at mamamahala sa pamamahagi ng tulong upang maiwasan ang matagal na proseso ng beripikasyon at pag-apruba.
Sa ilalim ng Bagong Pilipinas Rice Program, tumatanggap ang mga kwalipikadong benepisyaryo ng 10 kilo ng bigas kada dalawang buwan. Kabilang sa 16,000 benepisyaryo sa Puerto Princesa ang mga solo parents, senior citizens, at low-income earners.
Binigyang-diin din ng Pangulo na nakatutulong ang programa hindi lamang sa mga benepisyaryo kundi maging sa mga magsasaka dahil ang ipinamamahaging bigas ay direktang binibili mula sa mga lokal na rice farmers.
Ayon pa sa Pangulo, ginagamit din ang pondo ng LGSF sa pagpapatupad ng mga prayoridad na proyekto ng mga lokal na pamahalaan, kabilang ang food assistance, imprastraktura, at iba pang pasilidad para sa komunidad.
Sa Palawan, kabilang sa mga natapos na proyektong pinondohan ng LGSF ang rehabilitasyon at pagsesemento ng mga farm-to-market roads at solar electrification ng ilang barangay.
Muling iginiit ni Pangulong Marcos na nananatiling pangunahing prayoridad ng kanyang administrasyon ang food security, kasabay ng layuning matiyak na walang Pilipinong magugutom.
