Tinalakay ng Senate Committee on Health and Demography ang panukalang ibalik sa pangangasiwa ng pambansang pamahalaan ang Romblon Provincial Hospital (RPH) bilang bahagi ng serye ng mga panukalang batas na layong palakasin ang mga pampublikong ospital sa iba't ibang lalawigan.
Sa isinagawang pagdinig noong Martes, sinabi ni Senador Risa Hontiveros, chairperson ng komite, na kabilang ang Romblon sa mga lalawigang wala pang ospital na direktang pinamamahalaan ng Department of Health (DOH).
Ayon kay Hontiveros, mahalagang matugunan ang kakulangan ng mga DOH-run hospitals sa bansa upang mas mailapit ang dekalidad na serbisyong pangkalusugan sa publiko.
“Hindi sapat ang ospital na nasa papel lamang,” ani Hontiveros.
Kabilang sa mga panukalang tinalakay ng komite ang pagtatatag ng mga bagong ospital, pagpapalawak ng kasalukuyang pasilidad, at pagbabalik sa pangangasiwa ng DOH ng ilang provincial hospitals, kabilang ang Romblon Provincial Hospital.
Nagpahayag naman ng suporta si Senate President Pro Tempore Vicente Sotto III sa mga panukala at hiniling na maging co-sponsor ng mga ito.
Binigyang-diin ni Hontiveros na ang pagpapalakas ng mga ospital ay hindi lamang pagtatayo ng mga gusali o pagdaragdag ng mga kama kundi dapat ding tiyakin ang sapat na bilang ng mga doktor, nars, pharmacist, medical technologists, iba pang health workers, pati na rin ang kumpletong laboratoryo, operating rooms, gamot, oxygen supply, medical equipment, at maayos na referral system.
Dagdag pa niya, kinakailangan ding tiyakin ang tuloy-tuloy na pondo para sa operasyon at mga kawani ng mga ospital upang maging epektibo ang pagbibigay ng serbisyong medikal.
“Ayaw nating magpasa ng batas na magtatayo lamang ng bagong pangalan at bagong karatula, pero walang kakayahang magbigay ng aktuwal at maaasahang serbisyo,” aniya.
Ayon kay Hontiveros, pag-aaralan pa ng Senado kung ang bawat panukala ay tumutugon sa tunay na pangangailangan ng mga lalawigan at kung paano ito maisasama sa umiiral na provincial at regional referral networks nang hindi naaantala ang paghahatid ng serbisyong pangkalusugan.
Kapag naaprubahan, ang panukalang renationalization ng Romblon Provincial Hospital ay ilalagay ang ospital sa ilalim ng pangangasiwa ng DOH, habang ang mga detalye hinggil sa bed capacity, staffing, at antas ng serbisyong ibibigay nito ay ibabatay sa health data at pambansang plano ng pamahalaan.
