Pormal na nilagdaan ng Land Transportation Franchising and Regulatory Board (LTFRB) MIMAROPA at ng Lokal na Pamahalaan ng San Agustin ang isang Memorandum of Agreement (MOA) para sa planong pagtatayo ng LTFRB Extension Office sa bayan, isang hakbang na layong mailapit ang mga serbisyo ng ahensya sa mga transport operator at commuter.
Nilagdaan ang kasunduan nina San Agustin Mayor Aaron James Madrona at LTFRB MIMAROPA Regional Director Enrico Moreno Bautista, na sinaksihan nina Romblon Lone District Representative Eleandro “Budoy” Madrona at League of Municipalities of the Philippines (LMP)-Romblon Chapter President at Romblon Mayor Gerard Montojo.
Layunin ng extension office na gawing mas madali ang pagproseso ng mga prangkisa at iba pang transaksyon ng LTFRB nang hindi na kinakailangang bumiyahe pa ang mga transport operator at commuter sa ibang bayan.
Sa isang panayam, sinabi ni Mayor Madrona na malaking tulong ang pagkakaroon ng LTFRB office sa San Agustin upang mapabilis at mapalapit ang paghahatid ng serbisyo sa sektor ng pampublikong transportasyon sa lalawigan.
Aniya, napili ang San Agustin dahil sa estratehikong lokasyon nito na madaling mapupuntahan mula sa iba pang bayan at kalapit na mga isla na nangangailangan ng serbisyo ng LTFRB.
Samantala, tiniyak naman ni Congressman Madrona ang suporta ng kanyang tanggapan upang mapabilis ang pagbubukas ng extension office, kasabay ng pagbubunyag na naghahanda rin sila ng isang House Bill na maglalayong magtatag ng permanenteng tanggapan ng LTFRB sa lalawigan ng Romblon.
Nagpasalamat naman si Bautista sa lokal na pamahalaan ng San Agustin sa pagbibigay ng espasyo para sa planong opisina at sa pakikipagtulungan upang mapabilis ang implementasyon ng proyekto.
Ayon pa sa regional director, matagal na niyang hangarin na magkaroon ng tanggapan ang LTFRB sa bawat lalawigan ng MIMAROPA, at unti-unti na itong natutupad sa pamamagitan ng pakikipagtulungan ng mga lokal na pamahalaan.
