Sugatan ang isang 27-anyos na construction worker matapos itong pagsasaksakin ng kanyang bayaw sa loob ng kanilang tinitirhang bahay sa Sitio Tabing-dagat, Barangay Panique, Odiongan noong gabi ng Hulyo 22.
Batay sa ulat ng Odiongan Municipal Police Station (MPS), naganap ang insidente bandang alas-8:00 ng gabi. Agad namang naaresto ang 33-anyos na suspek, na isang butcher sa Odiongan Public Market.
Sa imbestigasyon ng pulisya, lumitaw na nagkaroon muna ng pagtatalo ang suspek at ang kanyang live-in partner sa loob ng kanilang silid. Namagitan ang biyenan ng suspek at sinaway ang dalawa upang tumigil na sa pag-aaway.
Habang nagpapatuloy ang komosyon, sinita ng biyenan ang suspek matapos nitong ihagis ang unan sa isang electric fan. Dahil dito, kinuwestiyon umano ng suspek kung bakit hindi rin nito pinagsasabihan ang biktima kapag sumasagot ito sa nakatatanda.
Lumabas ang suspek at kumuha ng kitchen knife.
Narinig ito ng biktima at tinanong kung bakit siya idinadamay sa kanilang alitan.
Nauwi ang kanilang pagtatalo sa komprontasyon hanggang sa pumasok umano ang suspek sa silid ng biktima at paulit-ulit itong sinaksak sa iba't ibang bahagi ng katawan.
Napigilan ang suspek ng kanyang live-in partner at biyenan, habang agad namang isinugod ng mga tauhan ng Municipal Disaster Risk Reduction and Management Office (MDRRMO) ang biktima sa Romblon Provincial Hospital upang malapatan ng lunas.
Narekober din ng mga rumespondeng pulis ang kitchen knife na hinihinalang ginamit sa insidente, na natagpuan ilang metro ang layo mula sa pinangyarihan ng krimen.
Nakakulong na ang suspek sa kustodiya ng Odiongan MPS habang inihahanda ang kasong Frustrated Homicide na isasampa laban sa kanya sa pamamagitan ng inquest proceedings.
