Walang natukoy na ghost flood control projects sa Romblon batay sa isinagawang imbestigasyon ng pamahalaang panlalawigan sa mahigit 80 proyekto na nagkakahalaga ng tinatayang mahigit ₱5.8 bilyon.
Ito ang tiniyak ni Governor Trina Firmalo-Fabic, kasabay ng pahayag na naisumite na sa Department of Public Works and Highways (DPWH) ang resulta ng isinagawang flood control probe para sa kaukulang aksyon ng ahensya.
Ayon sa gobernador, bagama't walang ghost projects na natukoy, may ilang proyekto na nakitaan ng mga kakulangan sa implementasyon na nakasaad sa ulat na isinumite sa DPWH.
“Sa na-conduct naming flood control probe, ‘yun ay naisubmit na namin ito sa DPWH for their consideration. On the whole naman, wala namang ghost projects dito sa atin, may iilan lang na may kunting pagkukulang sa program or things like that. Naka-indicate naman ‘yun sa report na naisubmit natin sa DPWH at si DPWH na ang mag-aasikaso nun,” ani Fabic sa isang Facebook live nitong July 30.
Matatandaang bumuo ang pamahalaang panlalawigan ng isang grupo noong nakaraang taon upang magsagawa ng imbestigasyon sa mga flood control projects sa lalawigan kasunod ng paglalahad ni Pangulong Ferdinand R. Marcos Jr. sa listahan ng mga flood control projects sa kanyang ikaapat na State of the Nation Address (SONA).
Saklaw ng imbestigasyon ang mahigit 80 flood control projects sa Romblon na may kabuuang halaga na tinatayang mahigit ₱5.8 bilyon, na ipinatupad mula Hulyo 2022 hanggang 2025.
Nauna nang sinabi ni Romblon Lone District Representative Eleandro Jesus “Budoy” Madrona na ang lahat ng flood control projects ng DPWH sa lalawigan ay aktuwal na naipatupad, kumpleto sa itinakdang specifications, at naaayon sa pangangailangan ng mga komunidad.
