Buong suporta ang ipinahayag ni Romblon Governor Trina Firmalo-Fabic sa panukalang batas na naglalayong ibalik sa pangangasiwa ng Department of Health (DOH) ang Romblon Provincial Hospital (RPH) sa isinagawang pagdinig ng Senate Committee on Health and Demography.
Sa kanyang pahayag sa committee hearing, sinabi ni Fabic na malaki ang magiging benepisyo ng renationalization ng RPH hindi lamang sa lalawigan kundi lalo na sa mga pasyenteng nangangailangan ng mas mataas na antas ng serbisyong medikal.
Ayon sa gobernador, halos kalahati ng taunang badyet ng pamahalaang panlalawigan ang napupunta sa operasyon ng walong pampublikong ospital sa Romblon. Aniya, ang Romblon Provincial Hospital pa lamang ay kumokonsumo na ng halos 15 porsiyento ng kabuuang provincial budget o humigit-kumulang ₱235 milyon para sa 2026.
Ipinaliwanag ni Fabic na kapag naisabatas ang renationalization, maaaring ilaan ng pamahalaang panlalawigan ang malaking bahagi ng pondong ito sa pagpapalakas ng iba pang ospital at mga programang pangkalusugan para sa mga Romblomanon.
Binigyang-diin din niya ang hamon sa pagre-recruit at pagpapanatili ng mga medical specialist sa lalawigan dahil sa heograpikal na lokasyon ng Romblon. Aniya, mas magiging madali para sa DOH na magtalaga ng mga espesyalista at subspecialist sa ospital sa pamamagitan ng malawak nitong network ng mga health professionals.
Sinabi rin ng gobernador na makatutulong ang renationalization sa paglalaan ng mas malaking pondo para sa imprastraktura at medical equipment, kabilang ang planong pagtatayo ng Intensive Care Unit (ICU) at pag-upgrade ng ospital bilang Level 2 Hospital.
Ayon pa kay Fabic, makikinabang din ang mga mahihirap na pasyente sa pagpapatupad ng Zero Balance Billing Policy ng DOH dahil sa kasalukuyan ay wala pang ospital sa Romblon na direktang pinangangasiwaan ng kagawaran.
Dagdag niya, mapapabilis din ang referral system ng mga pasyenteng kailangang ilipat sa mga secondary at tertiary hospitals sa Batangas at Metro Manila, na karamihan ay nasa ilalim ng DOH.
“Where the province is adequately able to operate our public hospitals, renationalizing Romblon Provincial Hospital would mobilize more resources and engender a strategic and more sustainable partnership between the province and the DOH towards better healthcare and quality of life for our citizens,” ani Fabic.
Nagpasalamat din ang gobernador kina Senadora Camille Villar sa pagsusulong ng Senate Bill No. 2061, Romblon Lone District Representative Eleandro Jesus “Budoy” Madrona sa paghahain ng kaparehong panukala sa Kamara, at sa Senate Committee on Health and Demography sa pagbibigay ng pagkakataong talakayin ang panukala.
Tiniyak din ni Fabic ang buong suporta ng Pamahalaang Panlalawigan ng Romblon upang matiyak ang maayos na transisyon sakaling maisabatas ang renationalization ng Romblon Provincial Hospital
