Pormal na ipinamahagi ng Schools Division Office (SDO) of Romblon ang 3,766 lapel microphones sa mga guro sa lalawigan upang mapahusay ang paghahatid ng leksyon sa mga silid-aralan at mapangalagaan ang kanilang boses.
Naging posible ang pamamahagi sa tulong ng Office of the President sa ilalim ni Pangulong Ferdinand R. Marcos Jr. at ng Department of Education (DepEd) sa pamumuno ni Education Secretary Juan Edgardo “Sonny” Angara.
Ayon kay Schools Division Superintendent Roger Capa, malaking tulong ang mga kagamitang ito sa pagpapabuti ng kalidad ng pagtuturo sa mga pampublikong paaralan.
“Ang simpleng kagamitang ito ay may layuning mapagaan ang pagtuturo, mapangalagaan ang boses ng ating mga guro, at mas maging malinaw at epektibo ang paghahatid ng kaalaman sa ating mga mag-aaral,” ani Capa.
Kasabay ng turnover ceremony, tumanggap din ang mga piling secondary schools sa Sibuyan Island ng metal detectors na donasyon ni Romblon Lone District Representative Eleandro Jesus “Budoy” F. Madrona.
Ayon kay Capa, makatutulong ang mga naturang kagamitan sa pagpapatibay ng seguridad sa mga paaralan at sa pagpapanatili ng ligtas na kapaligiran para sa mga mag-aaral at guro.
Nagpasalamat din ang Schools Division Office of Romblon sa Pangulo, sa DepEd, kay Secretary Angara, at kay Cong. Madrona sa patuloy na suporta sa sektor ng edukasyon.
“Maraming salamat po kay Pangulong Ferdinand R. Marcos Jr. (PBBM), sa Department of Education, at kay Secretary Sonny Angara at Congressman Budoy Madrona sa patuloy na pagsuporta sa kapakanan ng ating mga guro at sa pagpapalakas ng kalidad ng edukasyon sa ating bansa,” ani Capa.
