Tatlumpung handheld metal detectors ang ipinagkaloob ni Romblon Lone District Representative Eleandro Jesus “Budoy” Madrona sa Department of Education (DepEd) Schools Division of Romblon upang higit pang mapalakas ang seguridad sa mga pampublikong secondary schools sa lalawigan.
Ayon kay Schools Division Superintendent Roger Capa, tinanggap ng DepEd Romblon ang mga metal detector nitong Linggo bilang tugon sa panawagan ng mga magulang na paigtingin ang mga hakbang sa seguridad sa mga paaralan.
Ipamamahagi ang mga kagamitan sa 21 malalaking secondary schools na matatagpuan sa mga sentrong bayan at may nakatalagang security guards.
Batay sa listahan ng DepEd Romblon, dalawang metal detector ang matatanggap ng Alcantara National High School, Danao National High School, Looc National High School, Ferrol National High School, Odiongan National High School, Romblon National High School, San Andres National High School, at Guinbirayan National High School. Tatlong metal detector naman ang ilalaan sa Alcantara National High School, habang tig-iisang unit ang matatanggap ng iba pang benepisyaryong paaralan.
Nagpasalamat si Capa kay Madrona sa agarang pagtugon sa pangangailangan ng mga paaralan.
“Maraming salamat po, Congressman Budoy Madrona, sa inyong patuloy na malasakit, agarang pagtugon, at walang sawang suporta sa ating mga paaralan at mga mag-aaral,” ani Capa.
Ayon sa DepEd Romblon, bahagi ang pamamahagi ng mga metal detector ng patuloy na pagpapatibay ng mga hakbang sa seguridad upang mapangalagaan ang kapakanan ng mga mag-aaral, guro, at iba pang kawani ng paaralan.
Nauna nang nagpatupad ang DepEd ng mas mahigpit na school safety measures kasunod ng insidente ng pamamaril sa isang paaralan sa Tacloban City.
Kabilang sa mga ipinatutupad na hakbang ang mandatoryong inspeksyon ng mga bag sa pagpasok ng paaralan, random bag inspections kung kinakailangan, at mas pinaigting na koordinasyon sa Philippine National Police at iba pang ahensya upang matiyak ang kaligtasan ng mga mag-aaral.
Discussion about this post