Ligtas na nailigtas ng mga tripulante ng MV St. Ignatius of Loyola ng 2GO Travel ang isang babaeng pasahero matapos itong mahulog sa dagat habang nasa biyahe mula Caticlan patungong Batangas madaling araw ng Hulyo 30.
Ang barko ay nagmula sa Caticlan at dumaan sa Port of Odiongan, Romblon bago nagtuloy ng biyahe patungong Batangas. Hindi pa isinapubliko ng mga awtoridad ang pagkakakilanlan ng babaeng pasahero.
Ayon sa Philippine Coast Guard (PCG), nangyari ang insidente bandang alas-3:00 ng madaling araw, humigit-kumulang 4.5 nautical miles east by north ng Isla Verde, Batangas City.
Nakatanggap ng ulat ang Coast Guard Sub-Station (CGSS) Batangas City mula sa Vessel Traffic Management System (VTMS) Batangas at agad na nakipag-ugnayan sa barko. Kinumpirma ng mga tripulante na naiahon na nila ang pasahero bago pa dumating ang Coast Guard.
Agad ding nakipag-ugnayan ang PCG sa Asian Terminals Inc. (ATI) upang maghanda ng ambulansya at iba pang kinakailangang tulong sa pagdating ng barko sa pantalan.
Batay sa pagsusuri ng medical personnel ng barko, nasa maayos na kondisyon ang pasahero, at nagtamo lamang ng mga bahagyang gasgas.
Pagdating ng MV St. Ignatius of Loyola sa Port of Batangas bandang alas-5:00 ng umaga, agad na inasistehan ng mga tauhan ng CGSS Batangas City ang pasahero at dinala ito sa Batangas Medical Center para sa karagdagang pagsusuri at gamutan.
Ayon sa ilang pasahero na kasabay ng babae, sadyang tumalon umano ito mula sa barko sa hindi pa alam na dahillan. Patuloy ang imbestigasyon ng mga awtoridad tungkol sa insidente.
Pinuri naman ng Philippine Coast Guard ang maagap na pagtugon ng mga tripulante ng barko at muling tiniyak ang patuloy nitong pangangalaga sa kaligtasan ng mga pasahero sa pamamagitan ng mabilis na responde at pakikipag-ugnayan sa mga katuwang na ahensya.
