Nabigong makapagtala ng panalo ang Gilas Pilipinas sa katatapos na ikatlong window ng 2027 FIBA World Cup Asian Qualifiers matapos magtamo ng magkasunod na kabiguan laban sa New Zealand at Australia.
Sa unang laban noong Hulyo 3, 2026 sa Spark Arena sa Auckland, New Zealand, nakipagsabayan ang Gilas sa Tall Blacks ngunit yumuko sa double overtime, 106-102. Nagkaroon ng pagkakataon ang pambansang koponan na agawin ang panalo sa regulation at maging sa unang overtime, ngunit ilang mahahalagang turnover at mintis sa free throw line ang naging daan upang makabalik ang New Zealand at tuluyang maselyuhan ang panalo.
Mas mabigat naman ang sinapit ng Gilas sa ikalawang laro laban sa World No. 6 Australia noong Hulyo 6, 2026 sa RAC Arena sa Perth. Mula sa 8-all na iskor sa unang bahagi ng laro, nagpakawala ang Boomers ng 25-6 run na nagbigay sa kanila ng malaking kalamangan. Hindi na nakarekober ang Gilas at tuluyang natalo, 92-49.
Dahil sa dalawang kabiguang ito, umabot na sa apat ang sunod-sunod na pagkatalo ng Gilas Pilipinas sa Asian Qualifiers at bumagsak ito sa ikatlong puwesto ng Group A, sa likod ng Australia at New Zealand.
Sa kabila nito, nakasiguro pa rin ang Gilas Pilipinas ng puwesto sa susunod na yugto ng qualifiers. Nakatakda nilang makaharap ang Jordan at Iran sa ikaapat na window ng kompetisyon sa Agosto.
Kasama ng Pilipinas na umabante sa susunod na round ng 2027 FIBA World Cup Asian Qualifiers ang Australia, New Zealand, Japan, China, South Korea, Iran, Jordan, Syria, Lebanon, Saudi Arabia, at ang host nation na Qatar.
