Aabot sa ₱510 milyon halaga ng hinihinalang shabu ang nasabat ng mga awtoridad sa isinagawang interdiction operation sa Batangas Port nitong Huwebes ng umaga, July 30.
Ayon sa Philippine Drug Enforcement Agency (PDEA), dalawang hinihinalang drug courier ang naaresto habang isang 17-anyos na menor de edad na itinuturing na kanilang kasamahan ay nasagip sa operasyon na isinagawa bandang alas-8:50 ng umaga sa Batangas Port sa Barangay Sta. Clara, Batangas City.
Kinilala ng PDEA ang mga naaresto sa mga alyas na “Hasad,” isang 22-anyos na estudyante, at “Judelyn,” isang 27-anyos na walang trabaho. Kapwa sila residente ng Talon-Talon, Zamboanga City.
Nasamsam sa kanilang posesyon ang humigit-kumulang 75 kilo o 75,000 gramo ng hinihinalang shabu na may tinatayang standard drug price na ₱510 milyon.
Bukod sa ilegal na droga, nakumpiska rin ng mga operatiba ang dalawang identification card, tatlong cellular phone, isang puting van, iba't ibang financial at billing documents, at iba pang ebidensya.
Mahaharap ang dalawang suspek sa kasong paglabag sa Republic Act No. 9165 o Comprehensive Dangerous Drugs Act of 2002, habang ang menor de edad ay isasailalim sa pangangalaga ng local social welfare office para sa kaukulang intervention.
Isusumite naman sa PDEA Laboratory Service ang mga nakumpiskang ebidensya para sa forensic examination habang nagpapatuloy ang imbestigasyon.
Discussion about this post