Nananawagan si Sangguniang Panlalawigan Member Cary Falculan para sa pagsasagawa ng pagdinig upang talakayin ang matagal nang problema sa suplay at serbisyo ng kuryente sa isla ng Sibuyan.
Sa kanyang privilege speech sa sesyon ng Sangguniang Panlalawigan, sinabi ni Falculan na patuloy na nararanasan ng mga residente ng mga bayan ng Cajidiocan, Magdiwang, at San Fernando ang mga brownout, kakulangan sa suplay ng kuryente, at hindi maaasahang serbisyo sa loob ng maraming taon.
Ayon sa kanya, lumala pa umano ang sitwasyon nitong nakaraang mga buwan, na nakaapekto hindi lamang sa mga kabahayan kundi maging sa kabuhayan ng mga residente.
Binanggit ni Falculan ang mga ulat ng pagkasira ng mga frozen goods at appliances, gayundin ang epekto ng pagkawala ng kuryente sa komunikasyon, mga ospital, health facilities, paaralan, tanggapan, at iba pang pangunahing serbisyo sa isla.
Aniya, sa kabila ng mga naunang anunsyo at mga hakbang na isinagawa upang mapabuti ang serbisyo, patuloy pa ring nagtatanong ang mga residente kung ano ang pangmatagalang solusyon sa problema.
Ibinahagi rin ng opisyal na personal niyang naranasan ang pagkawala ng kuryente habang nananatili sa Sibuyan sa loob ng halos dalawang linggo kasama ang ilang kapwa miyembro ng Sangguniang Panlalawigan.
Dahil dito, hiniling niya sa kapulungan na magsagawa ng committee hearing upang mabigyang-linaw ang kasalukuyang kalagayan ng power supply sa isla at matalakay ang mga posibleng hakbang upang matugunan ang suliranin.
Nais niyang maimbitahan sa pagdinig ang Romblon Electric Cooperative, Inc. (ROMELCO), Department of Energy (DOE), National Electrification Administration (NEA), Energy Regulatory Commission (ERC), National Power Corporation (NPC), at iba pang ahensyang may kaugnayan sa missionary electrification.
Iminungkahi rin ni Falculan na dumalo sa pagdinig ang mga alkalde ng Cajidiocan, Magdiwang, at San Fernando upang maiparating ang kalagayan at hinaing ng kanilang mga nasasakupan.
Ayon sa kanya, layunin ng pagdinig na mabigyan ng pagkakataong maipaliwanag sa publiko ang tunay na sitwasyon ng suplay ng kuryente sa Sibuyan at matukoy ang mga kongkretong hakbang tungo sa mas maayos at maaasahang serbisyo.
