Inilunsad ng Romblon State University (RSU) noong Hunyo 3 ang Project PAG-IBIG at ang Family Empowerment Center (FEC) sa Main Campus nito sa Odiongan upang magbigay ng child care services at suporta sa mga pamilya, lalo na sa mga solo parent na nagtatrabaho o nag-aaral.
Pormal na binuksan ang pasilidad nina RSU President Merian P. Catajay-Mani at Commission on Higher Education (CHED) Commissioner Michelle Aguillar Ong.
Ang Family Empowerment Center ay magsisilbing ligtas na lugar kung saan maaaring iwan ng mga guro, kawani, estudyante, at iba pang miyembro ng komunidad ang kanilang mga anak habang sila ay nasa trabaho o paaralan. May mga volunteer teachers at espesyalista ring nakatalaga upang magbigay ng pangangalaga at gabay sa mga bata.
Ayon kay Ong, ang RSU ang naging launchpad ng Project ARUGA ng CHED at nanguna sa sabayang paglulunsad ng mga child care facility sa iba't ibang state universities and colleges sa bansa.
Sinabi rin niya na nakipagkasundo ang CHED at RSU sa iba't ibang ahensya ng pamahalaan, kabilang ang Technical Education and Skills Development Authority (TESDA), Department of Social Welfare and Development (DSWD), at mga lokal na pamahalaan upang matiyak ang pagpapatuloy ng programa.
“Hindi lang kasi ito programa ng CHED. Nandiyan ang TESDA na maaaring magbigay ng micro-credentials sa mga solo parents, ang mga LGUs na may datos, at ang DSWD. It takes a village to raise a child,” ani Ong.
Binanggit din ng opisyal na may humigit-kumulang 15.9 milyong solo parent sa bansa at 95 porsiyento sa mga ito ay kababaihan. Aniya, karamihan sa kanila ay walang college degree, ngunit kung mabibigyan ng pagkakataong makapag-aral at makapasok sa trabaho ay malaki ang maiaambag nila sa ekonomiya ng bansa.
Ayon naman kay Mani, layunin ng Project PAG-IBIG at ARUGA na maipadama ang suporta at pag-aaruga sa mga kabataan, kababaihan, at solo parent na empleyado at estudyante.
“Itong ARUGA at PAG-IBIG ay puwede nating ipadama sa pamamagitan ng pag-aalaga at pag-aaruga sa ating mga kabataan, kababaihan, at mga solo parents na empleyado at estudyante,” ani Mani.
Dagdag pa niya, isinama sa programa ang mga anak ng mga empleyado upang maging mas inklusibo ang serbisyong ibinibigay ng unibersidad.
Sinabi rin ni Mani na nagbibigay ang programa ng pag-asa para sa susunod na henerasyon sa pamamagitan ng pagtulong sa mga magulang at kanilang mga anak.
Bukas ang Family Empowerment Center mula Lunes hanggang Biyernes at maaaring magamit hindi lamang ng mga empleyado at estudyante ng RSU kundi maging ng iba pang miyembro ng publiko. (with reports from Charmine Malacad)
Discussion about this post