Nagpatupad ang Libertad National High School (LNHS) sa Odiongan ng mandatory bag inspection at iba pang hakbang sa seguridad bilang bahagi ng mga preventive measures upang mapanatiling ligtas ang mga mag-aaral, guro, at kawani ng paaralan.
Sa isang memorandum na inilabas nitong June 23 ni Principal IV Vilma Dahan, inatasan nito ang lahat ng teaching at non-teaching personnel, kabilang ang mga job order employees, na ipatupad ang bag inspection at iba pang school safety and security measures sa loob ng paaralan.
Ayon sa memorandum, ang hakbang ay alinsunod sa DepEd Order No. 006, Series of 2026, at bahagi ng layunin ng Department of Education na matiyak ang ligtas at maayos na kapaligiran para sa pag-aaral.
Sa ilalim ng patakaran, sasailalim sa bag inspection ang lahat ng estudyante, guro, non-teaching personnel, bisita, at iba pang indibidwal na papasok sa paaralan. Kailangan ding ipasuri ang mga school bag, backpack, handbag, parcel, at iba pang kahalintulad na lalagyan bago makapasok sa campus.
Inatasan din ang security guard ng paaralan na manatili sa gate sa oras ng pagpasok ng mga mag-aaral at kawani upang tiyaking maayos na nasusuri ang lahat ng pumapasok sa paaralan.
Pinahihintulutan din ang school head at mga awtorisadong tauhan na magsagawa ng random bag inspection sa loob ng mga silid-aralan at iba pang pasilidad ng paaralan kung kinakailangan para sa seguridad.
Nakasaad sa memorandum na ang mga inspeksyon ay dapat isagawa sa paraang may paggalang sa karapatan, dignidad, at kapakanan ng mga mag-aaral at naaayon sa Child Protection Policy at iba pang umiiral na patakaran ng DepEd.
Ayon pa sa paaralan, ang mga bag inspection ay hindi layuning magdulot ng abala o magbigay ng espesyal na pagtingin sa sinuman, kundi bahagi ng mga hakbang upang maiwasan ang pagpasok ng mga ipinagbabawal, mapanganib, o maaaring makapinsalang kagamitan sa loob ng paaralan.
Ang pagpapatupad ng mga hakbang sa seguridad ay kasunod ng mga insidente ng pananaksak at iba pang karahasang naiulat sa ilang paaralan sa iba't ibang bahagi ng bansa nitong mga nakalipas na araw at linggo.
Nanawagan naman ang pamunuan ng LNHS sa mga mag-aaral, magulang, guro, at iba pang miyembro ng school community na makiisa sa pagpapatupad ng mga panuntunan upang mapanatili ang isang ligtas at maayos na kapaligiran para sa pag-aaral.
