Target ng Pamahalaang Panlalawigan ng Romblon na matapos sa pagitan ng Hulyo at Agosto ngayong taon ang konstruksyon ng Romblon Provincial Hospital Buildings II at III upang mapalawak ang kapasidad at mapahusay ang serbisyong medikal sa lalawigan.
Ito ang inihayag ni Governor Trina Firmalo-Fabic matapos ang pagpupulong kasama ang mga kinatawan ng Legacy Construction, kaugnay ng pagpapatuloy ng proyekto.
Ayon kay Governor Fabic, tinalakay sa pagpupulong ang kasalukuyang estado ng konstruksyon at ang mga susunod na hakbang para sa implementasyon ng proyekto.
Sinabi ng gobernador na layunin ng pamahalaang panlalawigan na matapos ang mga gusali sa loob ng target na panahon upang magamit sa pagpapalawak ng mga serbisyong pangkalusugan para sa mga Romblomanon.
Ang Romblon Provincial Hospital Buildings II at III ay inaasahang magdaragdag ng pasilidad na makatutulong sa paghahatid ng mas episyente at mas maayos na serbisyong medikal sa mga pasyente sa lalawigan.
