Hinikayat ng Technical Education and Skills Development Authority (TESDA) Romblon ang mga residente ng San Andres na samantalahin ang mga technical-vocational education and training (TVET) courses at scholarship programs ng ahensya upang magkaroon ng dagdag na oportunidad sa trabaho at kabuhayan.
Sa isinagawang Information Caravan ng Philippine Information Agency (PIA) Romblon noong Mayo 14 sa Barangay Marigondon Sur, ipinaliwanag ni Atty. Glenn Niño Sartillo, Provincial Director ng TESDA Romblon, ang iba’t ibang training programs at scholarship opportunities na maaaring ma-avail ng mga residente.
Ayon kay Atty. Sartillo, patuloy na pinalalawak ng TESDA ang mga serbisyo nito sa iba’t ibang komunidad sa Romblon kabilang ang mga geographically isolated areas upang mas maraming residente ang magkaroon ng praktikal na kasanayan na maaari nilang magamit sa paghahanapbuhay o pagnenegosyo.
Hinimok din niya ang mga out-of-school youth, unemployed individuals, at mga manggagawang nais magkaroon ng karagdagang skills na mag-enroll sa mga kursong inaalok ng TESDA sa pamamagitan ng accredited training institutions at community-based programs.
Kabilang sa mga isinulong na kurso sa aktibidad ang may kaugnayan sa agrikultura at food processing.
Binigyang-diin din ni Sartillo ang mga scholarship program ng TESDA na nagbibigay ng libreng training, assessment, at training support allowance para sa mga kwalipikadong benepisyaryo.
Ayon pa sa TESDA Romblon, nakikipag-ugnayan na rin ang ahensya sa iba’t ibang local government units sa lalawigan para sa implementasyon ng karagdagang community-based training programs upang mas maraming residente sa iba’t ibang bayan ang maabot ng kanilang serbisyo.
Layunin umano ng programa na maiayon ang mga training courses sa pangangailangan ng mga komunidad at lokal na industriya habang pinalalawak ang access sa technical education sa mga malalayong lugar.
Bahagi ang information caravan ng patuloy na pagsisikap ng pamahalaan na mailapit ang mga serbisyo publiko at mapalawak ang kaalaman ng mamamayan hinggil sa livelihood at skills development programs sa lalawigan.
