Isang Sibuyanon mountaineer ang matagumpay na nakaakyat sa Mt. Yarigatake sa Northern Japanese Alps sa Japan sa gitna ng matinding snow at mapanganib na kondisyon sa bundok.
Kinilala ang mountaineer na si Christian Rafol, na itinuturing na kauna-unahang Sibuyanon na nakaakyat sa Mt. Yarigatake sa isang winter hike.
Si Rafol ay kabilang sa all-Filipino expedition team na pinangunahan ni Ace Dapat ng Mountains and Beyond kasama ang Filipino-Japanese partners na sina Yasuhiro Ogawa at Jick San.
Batay sa expedition report, lima lamang sa 13 mountaineers ang matagumpay na nakarating sa summit dahil sa technical at nagyeyelong kondisyon ng bundok.
Isinagawa ang expedition mula Mayo 9 hanggang Mayo 13, 2026 kung saan kinailangan ng mga kalahok na gumamit ng alpine equipment tulad ng crampons, ice axes, at helmets habang binabagtas ang makapal na yelo at snow sa bundok.
Sa summit push noong Mayo 11, nakaranas din umano ang grupo ng maliit na avalanche at rockfall habang pababa mula sa bundok ngunit walang nasaktan sa grupo.
Ayon kay Rafol, dala niya sa pag-akyat ang adbokasiya para sa mountain safety at pangangalaga sa kalikasan, lalo na sa Mount Guiting-Guiting Natural Park sa Sibuyan Island.
Sinabi rin nito na mahalagang mapanatili ang proteksyon sa mga kabundukan at likas na yaman ng Sibuyan bilang isa sa mga mahahalagang ecological areas sa bansa.
Bukod sa pagiging mountaineer, si Rafol ay isa ring nurse na nagtatrabaho sa Singapore at kabilang sa mga dumadalo sa mga pagpupulong ng Protected Area Management Board (PAMB) ng Mount Guiting-Guiting Natural Park.
Sa expedition report, inihalintulad ni Rafol ang karanasan sa Mt. Yarigatake sa Mt. Guiting-Guiting sa Sibuyan, bagamat mas matindi umano ang snow at icy conditions sa bundok sa Japan.
