Positibong tinanggap ng isang pribadong ospital sa Romblon ang pinalawak na maternity benefits ng Philippine Health Insurance Corporation (PhilHealth), na inaasahang makatutulong upang mabawasan ang gastusin ng mga buntis sa panganganak.
Ayon sa Isaiah Hospital and Medical Center, malaking tulong para sa mga ina at kanilang pamilya ang expanded maternity package na inanunsyo ng administrasyon ni Ferdinand R. Marcos Jr. at ipinatupad noong Abril 30, 2026.
Sa ilalim ng bagong benepisyo, itinaas ng PhilHealth ang coverage para sa normal delivery mula ₱9,750 hanggang ₱29,000. Samantala, ang coverage para sa cesarean section ay nasa pagitan na ng ₱58,000 hanggang ₱62,000 mula sa dating ₱37,000.
Pinalawak din ang prenatal care package mula apat na check-up tungo sa walong konsultasyon, kabilang ang laboratory tests at bakuna, bukod pa sa tatlong postnatal follow-up visits.
Ayon kay Diven Dimaala, makatutulong ang dagdag na benepisyo upang mabawasan ang out-of-pocket expenses ng mga pasyente, lalo na ang mga pamilyang may limitadong kita.
“With the expanded PhilHealth coverage, mothers who give birth in our hospital will no longer have to worry as much about hospital bills. This is a big relief, especially for families with limited income,” ani Dimaala.
Ipinaliwanag niya na noon ay may mga pasyente pa ring kinakailangang magdagdag ng malaking halaga kahit may PhilHealth assistance. Sa ilalim umano ng bagong rates, posible nang maliit o wala nang bayaran ang ilang ward patients sa mga pribadong ospital.
“For example, a mother undergoing normal delivery who previously paid additional expenses beyond the old ₱9,750 coverage can now benefit from up to ₱29,000 assistance. Even cesarean deliveries, which usually cost more, are now given much bigger support,” dagdag niya.
Nauna nang sinabi ni Pangulong Marcos na layunin ng programa na matiyak na makapanganak nang ligtas ang bawat ina nang hindi nangangamba sa gastusin.
“Simple lamang ang ating layunin, nais natin na matiyak na ang bawat ina ay makakapagpanganak nang ligtas at hindi nag-aalala kung saan kukuha ng pambayad,” ayon sa Pangulo sa kanyang video message.
Ayon pa sa pamunuan ng ospital, inaasahang mahihikayat ng mas malaking maternity coverage ang mas maraming buntis na magpatingin nang regular at manganak sa mga healthcare facilities na may trained medical professionals upang makatulong sa pagbawas ng maternal at infant health risks sa lalawigan.
