Isinulong ng Philippine Health Insurance Corporation (PhilHealth) Romblon ang Yaman ng Kalusugan Program o YAKAP at Guaranteed and Accessible Medications for Outpatient Treatment (GAMOT) benefit sa isinagawang Information Caravan ng Philippine Information Agency (PIA) Romblon noong Mayo 14 sa Barangay Marigondon Sur, San Andres.
Dumalo sa aktibidad ang mga residente at lokal na opisyal kung saan ipinaliwanag ng mga kinatawan ng PhilHealth Romblon na sina Jonathan Montojo at Baby Lynn Fabito ang mga benepisyo at proseso ng pag-avail ng programa.
Ayon kay Montojo, layunin ng GAMOT benefit sa ilalim ng YAKAP na matulungan ang mga miyembro ng PhilHealth na magkaroon ng access sa libre at abot-kayang gamot para sa outpatient treatment at maintenance medicines.
Ipinaliwanag niya na nakatutulong ang programa upang mabawasan ang out-of-pocket expenses ng mga pasyente sa pamamagitan ng tuloy-tuloy na access sa mga kinakailangang gamot mula sa accredited healthcare providers at partner facilities.
Dagdag pa niya, bahagi ang YAKAP program ng mas malawak na hakbang ng PhilHealth upang mapalakas ang primary healthcare services at preventive care sa mga komunidad.
Samantala, ipinaliwanag naman ni Fabito ang proseso ng pag-avail ng GAMOT benefit.
Ayon sa kanya, kinakailangang magpakonsulta muna ang pasyente sa YAKAP-accredited healthcare facilities tulad ng Rural Health Units, ospital, o PhilHealth-accredited Konsulta providers. Kapag nabigyan na ng reseta ng doktor, maaari na itong dalhin sa accredited GAMOT partner pharmacies upang makuha ang mga gamot na sakop ng programa.
Sinabi rin ni Fabito na maaaring maka-avail ang mga kwalipikadong PhilHealth members ng hanggang ₱20,000 na medication assistance kada taon depende sa prescribed treatment at covered medicines.
Bukod sa information drive, sinabi rin ng PhilHealth Romblon na nakikipag-ugnayan sila sa mga Rural Health Units sa iba’t ibang bayan ng lalawigan upang magsagawa ng mga Barangayan activities bilang bahagi ng pagpapalawak ng healthcare awareness at access sa mga serbisyo ng PhilHealth.
Sa pamamagitan ng mobile caravan services ng ahensya, maaaring makapagparehistro ng membership, makapag-update ng member records, makahingi ng PhilHealth ID assistance, at makakuha ng impormasyon hinggil sa Konsulta program at iba pang healthcare packages at benepisyo.
Bahagi ang naturang inisyatiba ng patuloy na pagsisikap ng pamahalaan sa ilalim ng administrasyon ni Pangulong Ferdinand R. Marcos Jr. upang mapalakas ang universal healthcare at mailapit ang mga serbisyo ng gobyerno sa mga komunidad, lalo na sa geographically isolated areas.
