Ligtas nang nakauwi sa Barangay Pato-o sa Odiongan si Jonalyn “Barbie” Española kasama ang kanyang pamilya matapos ang ilang araw na pananatili sa Maramag, Bukidnon, kasunod ng kanyang viral na panawagan ng tulong noong Abril 23.
Matatandaang humingi ng tulong si Española matapos ang hindi pagkakaunawaan sa pamilya ng kanyang partner kaugnay sa kabuhayan, na nagresulta sa kanilang kagustuhang makabalik sa Romblon.
Agad na kumilos ang tanggapan ni Congressman Eleandro Jesus “Budoy” Madrona sa pangunguna ni Chief of Staff Denon Madrona Jr., kung saan nakipag-ugnayan ang kanilang staff kay Española at nagbigay ng cash assistance upang makatulong sa kanilang sitwasyon.
Nakipagtulungan din ang tanggapan ni Congressman Audrey Zubiri sa pamamagitan ni Chief of Staff Roselyn Arances upang maisaayos ang biyahe ng pamilya. Sa tulong ng DSWD, nakabiyahe ang pamilya patungong Maynila.
Noong Mayo 1, sinalubong ng mga staff ng tanggapan ni Cong. Madrona ang pamilya sa NAIA at inihatid patungong Batangas port para sa kanilang biyahe pabalik ng Romblon.
Dumating ang pamilya sa Odiongan madaling-araw ng May 2 at sinalubong ng mga kinatawan ng CARE Odiongan na tumulong sa kanilang pag-uwi sa barangay.
Nagpasalamat naman ang pamilya ni Barbie sa mga tumulong sa kanilang sitwasyon, kabilang ang mga opisyal at indibidwal na naging daan upang makauwi sila nang ligtas.
Ayon sa tanggapan ni Cong. Madrona, patuloy ang kanilang pagtugon sa mga kahilingan ng mga mamamayan at pagbibigay ng agarang tulong sa mga nangangailangan sa lalawigan.
Discussion about this post