Nagtipon-tipon nitong Linggo ang mga residente ng Sibuyan Island upang magsagawa ng mapayapang pagtitipon bilang pagpapahayag ng kanilang pagtutol sa anumang pagmimina sa isla.
Bitbit ang iba’t ibang placard at streamer, nagtipon ang mga kalahok sa kalsada habang isinisigaw ang kanilang panawagang itigil ang pagmimina sa Sibuyan Island.
Makikita sa isinagawang kilos-protesta ang partisipasyon ng iba’t ibang sektor at edad kabilang ang mga kabataan, matatanda, at iba pang miyembro ng komunidad na nagpapakita ng malawak na suporta sa panawagang pangalagaan ang kalikasan ng isla.
Ayon sa mga nakalap na impormasyon ng Romblon News Network, isinagawa ang pagtitipon kasunod ng mga usap-usapan at pangamba ng ilang residente hinggil sa umano’y posibleng pagbabalik ng mining operations sa isla.
Gayunman, mariing itinanggi ng mining firm na may kontrata sa pamahalaan upang magsagawa ng exploration activities sa ilang bahagi ng San Fernando ang mga pangambang maaaring maapektuhan ang kagubatan, kabundukan, ilog, at biodiversity ng Sibuyan Island.
Matatandaang matagal nang isinusulong ng ilang environmental groups at residente ng Sibuyan ang pagtutol sa pagmimina dahil sa pangangalaga sa likas na yaman ng isla na kilala bilang isa sa mga mahahalagang ecological areas sa bansa.
Ayon sa kapulisan, naging mapayapa ang isinagawang pagtitipon at walang naitalang insidente.
Discussion about this post