Nagpakita ng pambihirang galing si Jerick Concepcion Faeldonia matapos manatiling walang talo sa Chess Katropa Sunday Strategic Battles na ginanap noong Abril 26, 2026 sa Bagong Barrio, Caloocan City.
Nagtala si Faeldonia ng walong panalo at dalawang tabla sa torneo, na nagpalawig sa kanyang unbeaten streak sa 24 sunod na laro.
“Masaya po ako sa naging performance ko,” ani ng 15-anyos na Arena International Master mula sa Odiongan, Romblon.
Kabilang sa kanyang impressive run ang mga naging resulta sa Odiongan Open at Sta. Fe Open, kung saan pareho siyang nagtala ng anim na panalo at isang tabla, bukod pa sa kanyang perpektong kampanya sa pinakahuling torneo.
Susunod na sasalang si Faeldonia sa Malolos City 2nd FIDE Rated Standard Tournament sa Xentro Mall Malolos ngayong Mayo, kung saan target niyang ipagpatuloy ang kanyang mainit na laro.
Bukod sa husay sa chess, pinuri rin si Faeldonia sa kanyang malasakit matapos ipangakong ido-donate ang kanyang premyo sa kapwa manlalaro na kasalukuyang nasa ospital.
Ayon sa kanyang ama at coach na si Ernie Fetisan Faeldonia, patunay ito na hindi lamang talento kundi mabuting puso rin ang taglay ng batang atleta.
