Nagkaloob si Congressman Eleandro Jesus Madrona ng iba’t ibang information technology (IT) equipment sa Technical Education and Skills Development Authority (TESDA) Romblon kabilang ang Romblon National Institute of Technology (RNIT) at Romblon Provincial Training Center (PTC) bilang suporta sa technical-vocational education sa lalawigan.
Kabilang sa mga ipinamahaging kagamitan ang mga telebisyon, speakers, at printers na magagamit sa mga classroom activities, presentations, skills training, at iba pang learning activities ng mga trainees at estudyante.
Ayon kay Madrona, personal niyang pondong ginamit ang pambili ng mga kagamitan upang makatulong sa pagpapabuti ng learning facilities at mapalawak pa ang resources na magagamit ng mga mag-aaral at trainers ng TESDA sa Romblon.
Sinabi rin ng kongresista na mahalagang masuportahan ang sektor ng edukasyon, partikular ang technical-vocational education, dahil nakatutulong ito upang magkaroon ng dagdag na kasanayan at oportunidad sa trabaho ang mga kabataan at iba pang nais mag-training sa lalawigan.
Dagdag pa niya, mahalaga rin ang pagkakaroon ng maayos at updated na kagamitan sa mga training institutions upang mas maging epektibo ang pagtuturo at pagsasanay sa mga estudyante.
Nagpasalamat naman ang mga opisyal ng TESDA Romblon sa ipinagkaloob na kagamitan na inaasahang makatutulong sa pagpapahusay ng kanilang training programs at learning environment.
Sa pahayag ng mga opisyal ng RNIT, PTC Romblon, at TESDA Romblon, sinabi nilang malaking tulong ang mga bagong equipment lalo na sa pagsasagawa ng lectures, demonstrations, at iba pang academic at technical activities sa kanilang mga training center at paaralan.
Patuloy rin umanong nakikipag-ugnayan ang TESDA Romblon sa iba’t ibang stakeholders at partner agencies upang mapalawak pa ang suporta sa technical-vocational education at mapabuti ang kalidad ng pagsasanay para sa mga trainees sa lalawigan.
