Nakakaranas ng halos 24 oras na brownout ang ilang lugar sa Sibuyan Island matapos magkaroon ng kakulangan sa suplay ng kuryente dahil sa pagkasira ng ilang generator sets ng National Power Corporation (NPC).
Ayon sa Romblon Electric Cooperative (ROMELCO), nagkaroon ng power deficit sa isla dahil sa sunod-sunod na pagkasira ng mga planta ng kuryente ng NPC na nagsusuplay ng kuryente sa Sibuyan grid.
Batay sa mga ulat na nakarating sa Romblon News Network, ilang barangay sa isla ang halos isang araw nang walang suplay ng kuryente, na nakaapekto sa mga residente at negosyo sa lugar.
Ipinaliwanag ni Engr. Rene Fajilagutan, General Manager ng ROMELCO, na nagkaroon ng multiple genset breakdown sa mga planta ng NPC dahilan upang hindi matustusan ang pangangailangan sa kuryente ng buong isla.
“Nagkaroon kasi ng multiple genset breakdown ang NPC power,” ayon kay Fajilagutan.
Gayunman, sinabi niyang dumating na nitong umaga ang tatlong 800-KVA rental generator sets ng NPC upang makatulong sa pagdagdag ng suplay ng kuryente sa Sibuyan grid.
“On a positive note, dumating na kaninang umaga ang 3×800KVA Rental Gensets ng NPC to augment the power supply sa Sibuyan grid. Hopefully on or before May 15, the power supply will normalize,” dagdag niya.
Patuloy namang mino-monitor ng ROMELCO at NPC ang sitwasyon habang inaasahang unti-unting babalik sa normal ang suplay ng kuryente sa isla sa mga susunod na araw.
Discussion about this post