Aabot sa 500 college graduating students mula sa Romblon State University at Erhard Systems Technological Institute Odiongan ang tumanggap ng tig-₱2,500 financial assistance mula sa lokal na pamahalaan ng Odiongan bilang bahagi ng suporta nito sa mga kabataang malapit nang makatapos ng pag-aaral.
Kabilang sa mga benepisyaryo ang mga graduating students mula sa iba’t ibang kurso na inaasahang magtatapos ngayong taon.
Ikatlong taon na itong ipinatutupad ng lokal na pamahalaan bilang bahagi ng programa nito para makatulong sa mga estudyante sa kanilang gastusin habang tinatapos ang kanilang kolehiyo.
Ayon kay Engr. Reden Escarilla, layunin ng programa na kilalanin ang pagsisikap ng mga kabataan na makatapos ng pag-aaral sa kabila ng iba’t ibang hamon sa buhay at gastusin sa edukasyon.
Sinabi rin ni Escarilla na naniniwala ang pamahalaang bayan na mahalagang mamuhunan sa edukasyon dahil ang mga kabataan ang inaasahang magiging katuwang sa pag-unlad ng kanilang pamilya at ng buong bayan ng Odiongan.
Bukod sa financial assistance, patuloy rin umanong nagsasagawa ang lokal na pamahalaan ng iba’t ibang youth development programs na nakatuon sa edukasyon, leadership training, at employment opportunities para sa mga kabataan sa bayan.
