Nasungkit ni National Master Jasper Faeldonia ang kampeonato sa 179th Fiesta Chess Tournament na ginanap sa Odiongan Legislative Building sa Odiongan, Romblon noong Abril 4.
Nagtapos si Faeldonia sa 7-round Swiss System na paligsahan na may rekord na walang talo at nakapagtala ng 6.5 puntos mula sa anim na panalo at isang tabla upang maiuwi ang titulo at premyong ₱8,000.
Ayon kay Faeldonia, ikinatuwa niya ang panalo dahil karamihan sa mga nangungunang manlalaro mula sa lalawigan ng Romblon ay lumahok sa torneo. Siya rin ang naging Most Valuable Player sa nakaraang NCAA chess meet at bahagi ng koponan ng De La Salle-College of Saint Benilde na nagkampeon sa nasabing kompetisyon.
Pumangalawa at pumangatlo sina Jerick Faeldonia at Nepthali Bantang na kapwa nagtala ng tig-6.0 puntos.
Nakuha naman nina Vance Thristian Fajarit at Rilly Familara ang ikaapat at ikalimang puwesto matapos makapagtala ng tig-5.5 puntos sa torneo.
Discussion about this post