Humahakot ng mga gintong medalya ang Team Romblon sa iba’t ibang sporting events sa nagpapatuloy na MIMAROPA Regional Athletic Association Meet na ginaganap sa Sablayan, Occidental Mindoro.
Pinangunahan ng football team ng Romblon ang kanilang kampanya matapos masungkit ang gold medal sa Secondary Boys Football. Naging dominante ang koponan matapos manalo sa lahat ng apat nilang laban sa torneo. Sa kanilang unang laro, tinalo nila ang koponan ng Palawan sa iskor na 2–0 sa pamamagitan ng mga goal nina Jeff Kristopher Sim at Mark Kenneth Andenig. Sa ikalawang laban, nanaig sila laban sa Puerto Princesa sa iskor na 1–0 kung saan si Nathaniel Roco ang nakapagtala ng goal. Sa ikatlong laro ay tinalo nila ang host na Occidental Mindoro sa iskor na 4–0 sa tulong ng mga goal nina Nathaniel Roco, Rafael Villanueva, Miko Mabasa at Anjo Escalada. Sa kanilang huling laro ay nanaig sila laban sa Oriental Mindoro sa iskor na 4–1 sa pamamagitan ng mga goal nina Jeff Kristopher Sim, Anjo Escalada, Prince Madeja at Cymar Mariveles. Pinamunuan ang koponan ni head coach Josiel Macalisang kasama ang mga assistant coach na sina Huensil Sabucojan, Francis Mabasa at Louie John Valeroso.
Nagwagi rin ng gold medal ang Team Romblon sa Futsal Secondary Girls matapos manatiling undefeated sa buong torneo. Sa kanilang unang laro ay tinalo nila ang koponan ng Marinduque sa iskor na 9–3. Sinundan ito ng panalo laban sa Oriental Mindoro, 4–0, bago tinalo ang Puerto Princesa City sa iskor na 6–2. Sa kanilang huling laban ay nanaig sila laban sa Occidental Mindoro sa iskor na 7–2. Ang koponan ay pinamunuan ni head coach Angelica Myka Merida kasama ang mga assistant coach na sina Aumbrey Perez Repil, Francis Mabasa at Louie John Valeroso.
Nagbigay din ng karangalan sa Romblon ang mga manlalaro sa chess. Nasungkit ni Elijah Madeja ang gold medal sa Secondary Boys Rapid Category. Nagwagi rin ng gold medal ang Chess Boys Team Event na kinabibilangan nina Elijah Madeja, Mark Joseph Repizo at Jimson Serrano II, habang nakapagdagdag pa ng bronze medal si Repizo sa Rapid Category. Ang chess team ay ginabayan ni coach Menche Mangarin.
Sa archery, nagkamit ng gold medal si Hazel Ace Garciano sa Secondary Girls sa tulong ng kanyang coach na si Elme John Taladtad.
Sa athletics, nagwagi ng gold medal si Cyra Rovira sa Secondary Girls 400-meter hurdles sa ilalim ng paggabay ni coach Nora Famorcan. Isa pang gintong medalya ang nakuha ni Renz Sevilla sa Secondary Boys Long Jump sa tulong ni coach Michael Glenn Palomata.
Sa elementary division ng table tennis, nagkamit ng gold medal ang tambalan nina Clifford Magayam at Edwelyn Sininajan sa Mixed Doubles. Ang koponan ay ginabayan ni head coach Juanito Magayam.
Nagwagi rin ng gold medal si Meril Gabuna sa Elementary Girls 400-meter hurdles sa ilalim ng paggabay ni coach Phoebe Falcunitin.
Nakapagdagdag naman ng silver medal sina Avreil Jaaz sa Elementary Girls 400-meter hurdles at Quiel Josh Casulla sa Elementary Boys 400-meter hurdles. Samantala, bronze medal naman ang napanalunan nina Francis Dwin Galano sa Elementary Boys 400-meter hurdles at Arbie Marvilla sa Elementary Boys Long Jump.
Sa kasalukuyan ay mayroon nang 19 gold medals ang Team Romblon mula sa pinagsamang Secondary at Elementary levels. Inaasahan pang madaragdagan ito sa ikatlong araw ng kompetisyon dahil sa mga championship matches na lalaruin ng koponan.
Malaki ang itinaas ng performance ng Romblon kumpara sa nakaraang edisyon ng palaro kung saan walong gintong medalya lamang ang kanilang napanalunan sa MIMAROPA RAA Meet 2025 na ginanap sa Puerto Princesa City.
