Hindi nakikita ng Provincial Tourism Office ng lalawigan ng Romblon ang pagbaba ng bilang ng mga turistang bibisita ngayong Semana Santa sa kabila ng pagtaas ng pamasahe sa barko dulot ng pagmahal ng presyo ng gasolina.
Ayon kay Provincial Tourism Officer Kim Faderon, nananatiling manageable para sa mga turista ang ipinatupad na dagdag-singil ng mga shipping lines kaya inaasahang tuloy pa rin ang pagdating ng mga bisita sa probinsya.
Sinabi rin ni Faderon na wala pang napag-uusapang intervention gaya ng paglibre sa entrance fee sa mga pasyalan. Aniya, mababa lamang ang sinisingil sa karamihan ng tourist destinations sa lalawigan at maaaring maapektuhan ang kita ng mga lokal na negosyante kung aalisin ito.
Bilang paghahanda, nagpatawag ng coordination meeting si Romblon Governor Trina Alejandra Q. Firmalo-Fabic kasama ang iba’t ibang ahensya ng pamahalaan na sangkot sa paghahanda sa pagdating ng mga turista.
Nagpatawag na rin ng hiwalay na pagpupulong ang mga lokal na pamahalaan sa lalawigan upang i-activate ang mga Incident Management Teams ng bawat munisipyo.
Ayon pa kay Faderon, iniulat ng Philippine Coast Guard at Philippine National Police na nakaantabay na ang kanilang mga tauhan sa mga pasyalan at terminal hub sa lalawigan upang matiyak ang seguridad ng mga turista ngayong Holy Week.
