Naging makasaysayan ang paglahok ng Team Romblon sa katatapos lamang na MIMAROPA RAA Meet 2026 na ginanap sa Sablayan, Occidental Mindoro noong Marso 9–12, 2026.
Naitala ng lalawigan ang pinakamaraming medalya sa kasaysayan ng kanilang kampanya matapos makapagtala ng kabuuang 123 medalya mula sa pinagsamang Elementary at Secondary levels. Sa naturang kompetisyon, ilang atleta ang nanguna sa pag-ambag ng mga gintong medalya para sa Team Romblon.
Isa sa nanguna si Hazel Ace Garciano mula Agojo, Looc, Romblon matapos makakuha ng limang gintong medalya sa Archery 30-meter category. Bukod sa mga gintong medalya, nakapagdagdag din siya ng silver at bronze upang maitala ang kabuuang walong medalya sa naturang kompetisyon.
Nagningning din si Roda Ngo, isang Grade 6 student mula sa Sacred Heart School–Romblon sa bayan ng Looc, matapos makapag-uwi ng tatlong gintong medalya sa chess sa Standard Individual, Team Standard, at Blitz Individual categories. Nakapagdagdag pa ng tatlong gintong medalya ang kanyang high school counterpart na si Elijah Madeja mula San Andres, Romblon sa Rapid Individual, Team Rapid, at Standard Team events. Bukod sa anim na gintong medalya mula sa dalawang atleta, nakapagtala rin ang Romblon chess team ng isang silver at isang bronze medal.
Kabilang din sa chess team na nag-ambag ng medalya sina Marc Josef Repizo ng Cajidiocan National High School, Jimson Serrano II ng Magdiwang National High School, at Mary Kirsten Love Fornal ng Danao Elementary School sa Cajidiocan.
Sa athletics, namayagpag si Wyndel Brix Magracia mula Barangay Logbon, Romblon, Romblon matapos makuha ang tatlong gintong medalya sa Secondary level sa 5000m dash, 1500m dash, at 3000m steeplechase. Nakapagdagdag din siya ng isang silver medal bilang bahagi ng 4×400 relay team. Ang kanyang performance ay ginabayan ng mga coach na sina Glenn Palomata at Mark Jerwin Sacapaño.
Nakapagtala rin ng bagong marka si Renz Sevilla, Grade 12 student ng Looc National High School, matapos maitala ang bagong MRAA record sa triple jump na 14.41 meters, na lumampas sa dating rekord na 13.04 meters. Nakapag-uwi siya ng dalawang gintong medalya at isang silver medal sa high jump. Matapos ang kanyang pagtatapos sa high school, nakuha siya ng Jose Rizal University kung saan inaasahang mas mahahasa pa ang kanyang kakayahan sa ilalim ng paggabay ni Elma Muros-Posadas.
Sa kabuuan, ang athletics ang may pinakamaraming naiuwing gintong medalya para sa Team Romblon na umabot sa 17. Ilan sa mga atletang nagrepresenta sa athletics ay sina Mark Bryan Larobis ng Romblon, Janrey Venancio ng Agojo International School, Daniel Rico ng Otod Elementary School, Cedrick Mendoza ng Looc National High School, Jamella Villaresis ng Agripino Armedilla National High School, Justin Real ng Cambalo Elementary School, Mereil Vien Gabuna ng Agojo Integrated School, Fratzesca Fate Martino ng Danao Elementary School, Avriel Jaaz F. Pahit ng Agojo Integrated School, Cassandra Lucas ng Agojo Integrated School, Shyna Manes ng Danao Elementary School, at Cyra Rovira ng Cajidiocan National High School.
