Patuloy ang pagningning ng marathon runner na si Jose Fabito Jr. ng Romblon matapos muli siyang magkampeon sa Baguio Marathon 42K Run na ginanap sa Baguio noong Marso 8, 2026.
Tinalo ni Fabito ang kabuuang 564 na kalahok sa naturang karera matapos niyang tapusin ang 42-kilometer race sa oras na 2 oras, 52 minuto at 2 segundo upang masungkit ang kampeonato.
Hindi pa man kalahati ang taong 2026 ay sunod-sunod na ang mga karerang sinalihan ng Romblomanong atleta. Noong nakaraang buwan ng Pebrero ay lumahok din siya sa 7-Eleven Run Series 42K Marathon na ginanap sa Filinvest City kung saan nagtapos siya sa ikalawang puwesto sa overall standings.
Sa kabila ng halos buwanang pagsali sa iba’t ibang marathon events sa bansa, ang isa sa pangunahing pinaghahandaan ni Fabito ay ang prestihiyosong Boston Marathon sa Estados Unidos, na kinikilala bilang isa sa pinakamahahalagang marathon races sa buong mundo.
Nakakuha ng qualification si Fabito para sa naturang karera matapos ang kanyang mahusay na performance sa Taipei Marathon noong Enero 2026.
Bagama’t wala pang inilalabas na eksaktong petsa ang mga organizer para sa susunod na Boston Marathon, patuloy ang masinsinang paghahanda ni Fabito sa pamamagitan ng pagsali sa iba’t ibang marathon races sa bansa bilang bahagi ng kanyang preparasyon para sa itinuturing na pinakamalaking karera sa kanyang running career.
