Nakatanggap ng ₱370,000 halaga ng livelihood assistance ang San Jose Family Care Credit Cooperative mula sa Department of Labor and Employment MIMAROPA upang palakasin ang lokal na produksyon ng tsinelas at sandalyas sa bayan.
Kabilang sa ipinagkaloob na tulong ang mga modernong sewing at sole-pressing machines na papalit sa dating manu-manong proseso ng paggawa. Sa tulong ng teknikal na gabay mula sa Department of Science and Technology, inaasahang mapapabilis ang produksyon at mapapabuti ang kalidad ng mga produktong ginagawa ng kooperatiba.
Binubuo ng mga kababaihan, karamihan ay mga ina, ang mga miyembro ng kooperatiba na umaasa sa paggawa ng tsinelas bilang pangunahing kabuhayan. Sa pamamagitan ng bagong kagamitan, inaasahang tataas ang kapasidad ng produksyon at madaragdagan ang kita ng mga miyembro.
Sa turnover ceremony, sinabi ni DOLE Romblon Provincial Director Karen Bugarin na layunin ng programa na mabigyan ng angkop na kagamitan ang mga benepisyaryo upang mapalakas ang kanilang kabuhayan.
Ayon naman kay Analyn Guijaro, malaking tulong ang mga bagong kagamitan dahil mapapabilis ang kanilang produksyon kumpara sa dating mano-manong paggawa.
Inaasahan na sa tulong ng modernisasyon ng produksyon, mas mapapalawak ng kooperatiba ang merkado nito sa labas ng Romblon at makalilikha ng karagdagang oportunidad sa trabaho para sa mga residente.
Discussion about this post