Palalakasin ng lokal na pamahalaan ng Odiongan ang industriya ng niyog sa bayan bilang bahagi ng mga inisyatibo kaugnay ng pagdiriwang ng Kanidugan Festival 2026 at ika-179 na Founding Anniversary ng munisipalidad.
Ayon kay Mayor Roger Fodra, nakatakdang makipag-ugnayan ang pamahalaang bayan sa Philippine Coconut Authority (PCA) upang mapalawak ang pagtatanim ng niyog sa iba’t ibang bahagi ng Odiongan at mapalakas ang suplay ng raw materials para sa mga lokal na produkto.
Sinabi ng alkalde na layunin ng koordinasyon sa PCA Regional Office na matulungan ang mga coconut farmers at mapataas ang produksyon ng niyog sa bayan. Dagdag niya, may ilang pasilidad sa Odiongan na hindi lubos na napapakinabangan dahil sa kakulangan ng suplay ng niyog, kabilang ang pagawaan ng coco sugar sa Barangay Malilico.
Ipinaliwanag ni Fodra na sa oras na madagdagan ang suplay ng niyog, inaasahang mas mapapakinabangan ang mga umiiral na pasilidad at mas mabibigyan ng pagkakataon ang mga lokal na negosyante at maliliit na negosyo na makalikha ng mga produktong may halagang pangkalakalan.
Bilang paghahanda sa inaasahang paglago ng coconut industry at upang suportahan ang micro, small, and medium enterprises (MSMEs), inihahanda rin ng lokal na pamahalaan ang pagsasaayos ng Municipal Tourism Building upang gawing bagong Pasalubong Center ng bayan.
Layunin ng planong ito na magkaroon ng one-stop shop para sa mga turistang bibisita sa Odiongan kung saan maipapakita at maibebenta ang iba’t ibang lokal na produkto, kabilang ang mga produktong mula sa niyog na gawa ng mga lokal na magsasaka at negosyante.
Discussion about this post