Namahagi ang Department of Information and Communications Technology (DICT) ng mga tablet sa 24 na barangay sa lalawigan ng Romblon bilang bahagi ng pagpapalakas ng digital healthcare system at pagpapalapit ng serbisyong medikal sa mga komunidad.
Isinagawa ang turnover program noong Marso 17 sa Lyn’s Fern Garden and Restaurant, kung saan personal na pinangunahan ang aktibidad nina DICT MIMAROPA Regional Director Emmylou Delfin at Romblon Governor Trina Firmalo-Fabic, kasama ang iba pang opisyal mula sa pamahalaan at pribadong sektor.
Ayon sa pamahalaang panlalawigan, layunin ng pamamahagi ng mga tablet na mapadali ang access ng mga residente sa serbisyong pangkalusugan sa pamamagitan ng online consultations, partikular sa mga geographically isolated at disadvantaged areas.
Kabilang sa mga benepisyaryo ang mga health facility mula sa 24 barangay sa iba’t ibang bayan tulad ng San Andres, Ferrol, Alcantara, San Agustin, San Fernando, Sta. Maria, Romblon, Cajidiocan, Santa Fe, Looc, Calatrava, Corcuera, Banton, at Concepcion.
Sa pamamagitan ng mga kagamitang ito, inaasahang mapapalakas ang paggamit ng digital platforms sa paghahatid ng serbisyong pangkalusugan, kabilang ang konsultasyon sa mga doktor sa pamamagitan ng online applications.
Matapos ang turnover, nagsagawa rin ng pagsasanay ang mga kalahok hinggil sa paggamit ng mWell platform sa pangunguna ni Stella Rodriguez, na naglalayong magbigay ng libreng online medical consultation at iba pang serbisyong pangkalusugan.
Ipinakita rin sa aktibidad ang eGov App bilang bahagi ng pagpapalawak ng digital services ng pamahalaan sa lokal na antas.
Bahagi ang naturang programa ng partnership ng DICT at ng United Nations Development Programme sa ilalim ng Digital Bayanihan: Expanding DICT–UNDP Support for Inclusive Connectivity. Kabilang ito sa tinatawag na DICT–UNDP CoRe FW4A Project na naglalayong palawakin ang digital connectivity at serbisyong pampubliko sa iba’t ibang bahagi ng bansa.
Ayon sa DICT, patuloy ang kanilang pagsisikap na mapahusay ang digital governance at mapabilis ang paghahatid ng mga serbisyong pampubliko, lalo na sa sektor ng kalusugan, sa pamamagitan ng makabagong teknolohiya at pakikipagtulungan sa iba’t ibang ahensya.
