Nanatiling stable ang suplay ng baboy sa lalawigan ng Romblon sa kabila ng mga naitalang kaso ng African Swine Fever (ASF) sa ilang lugar, ayon sa pamahalaang panlalawigan.
Sa panayam ng Philippine Information Agency (PIA) Romblon nitong Miyerkules, sinabi ni Joselito Fabon ng Provincial Veterinary Office na sapat pa rin ang suplay ng baboy sa lalawigan upang matugunan ang pang-araw-araw na pangangailangan ng mga residente.
Batay sa datos ng Provincial Veterinary Office, tinatayang nasa mahigit 26,000 ang kasalukuyang populasyon ng baboy sa buong Romblon.
Ayon kay Fabon, wala umanong kakulangan sa suplay at sa katunayan ay halos nagkakaroon pa ng sabayang pagpapalaki ng baboy ang ilang hog raisers. Dahil dito, lumalabas na nasa tamang antas ang suplay at hindi pa umaabot sa kakulangan o labis na kakapusan sa merkado.
Ipinaliwanag din ni Fabon na bagama’t may mga lugar na apektado ng ASF, patuloy ang mahigpit na pagpapatupad ng mga hakbang sa biosecurity, monitoring, at pagbabantay sa paggalaw ng mga baboy upang maiwasan ang pagkalat ng sakit at mapanatili ang katatagan ng suplay sa lalawigan.
Samantala, sa bayan ng Odiongan, iniulat ni Martin Lasaga, hepe ng Municipal Economic Enterprise Development Office (MEEDO), na umaabot sa 30 hanggang 35 baboy ang araw-araw na kinakatay sa municipal slaughterhouse, na indikasyon ng tuloy-tuloy na suplay ng karne ng baboy sa lokal na pamilihan.
Tiniyak ng Provincial Veterinary Office na magpapatuloy ang koordinasyon nito sa mga lokal na pamahalaan upang mabantayan ang kalagayan ng ASF sa lalawigan at masigurong hindi maaapektuhan ang suplay at kaligtasan ng pagkain para sa publiko.
