Makalipas ang mahigit isang dekada mula nang una silang nagharap noong 2015, itinakda na ang ikalawang laban nina Manny Pacquiao at Floyd Mayweather Jr.. Nakatakda ang rematch sa Setyembre 20, 2026 (Manila Time) sa Sphere sa Las Vegas, Nevada, USA.
Mapapanood ang laban sa pamamagitan ng Netflix na mag-i-stream ng event sa buong mundo. Katuwang sa promosyon ang Manny Pacquiao Promotions, Mayweather Promotions, at CSI Sports/Fight Sports.
Nauna rito, inanunsyo ni Mayweather ang kanyang pagbabalik sa ring at ang planong exhibition match laban kay Mike Tyson, dating heavyweight champion. Kasunod ng anunsyo, naglabas ng hamon si Pacquiao para sa rematch, na tinanggap naman ni Mayweather.
Unang nagharap ang dalawa noong Mayo 2, 2015, kung saan nanalo si Mayweather via unanimous decision. Ang laban ay nakapagtala ng humigit-kumulang 4.6 milyong pay-per-view buys, tinatayang $410 milyon na kita, at $72.2 milyon mula sa ticket sales.
Huling lumaban si Mayweather noong 2017 laban kay Conor McGregor at nagwagi sa pamamagitan ng knockout. Sa kasalukuyan, hawak niya ang rekord na 50 panalo, walang talo, at 27 knockouts. Bago ang rematch kay Pacquiao, inaasahang matutuloy muna ang kanyang exhibition bout laban kay Tyson. Ayon kay Mayweather, nanalo na siya kay Pacquiao noong una nilang paghaharap.
Samantala, si Pacquiao ay huling lumaban kay Mario Barrios noong Hulyo 20, 2025 para sa WBC welterweight title na nauwi sa majority draw. Bago nito, nagpahayag siya ng pagreretiro matapos matalo kay Yordenis Ugas noong 2021.
Bago ang rematch kay Mayweather, nakatakda ring lumaban si Pacquiao sa isang exhibition match laban sa kanyang dating sparring partner na si Ruslan Provodnikov sa Abril 19, 2026 sa Thomas & Mack Center sa Las Vegas.
Sa kasalukuyan, may rekord si Pacquiao na 62 panalo, 8 talo, at 3 tabla.
