Nagpaalala ang isang health expert na maaaring maiwasan ang Nipah virus at iba pang nakahahawang sakit kung paiigtingin ang kalinisan at pag-iingat sa araw-araw na pamumuhay.
Sa panayam, sinabi ni Dr. Renato Menrige Jr., Provincial Health Officer ng Provincial Health Office ng Romblon, na wala pang naitatalang kaso ng Nipah virus sa Pilipinas sa kasalukuyan.
Ipinaliwanag ni Menrige na ang Nipah virus ay isang zoonotic disease o sakit na naipapasa mula sa hayop patungo sa tao.
Karaniwang nagmumula ang virus sa mga paniki at maaari ring maipasa sa mga tao sa pamamagitan ng direktang kontak sa nahawaang hayop, pagkain, o sa pamamagitan ng close contact sa taong may impeksyon.
Kabilang sa mga sintomas ng Nipah virus ang lagnat, pananakit ng ulo, ubo, hirap sa paghinga, at sa malulubhang kaso ay maaaring magdulot ng pamamaga ng utak o encephalitis na maaaring humantong sa pagkamatay.
Ayon kay Menrige, bagama’t mataas ang fatality rate ng virus na ito, maaari naman itong maiwasan sa pamamagitan ng wastong kalinisan at pag-iingat. Aniya, kailangang mag-ingat ang publiko sa lahat ng oras dahil hindi lamang Nipah virus ang maaaring makahawa, at maiiwasan ito sa pamamagitan ng hygiene at prevention tulad ng paggamit ng mask at regular na paghuhugas ng kamay.
Pinayuhan din ng opisyal ang publiko na huwag balewalain ang anumang sintomas at agad magpatingin sa doktor. Aniya, kung makaramdam ng sintomas ay magpatingin agad sa doktor dahil libre naman ang konsultasyon sa mga Rural Health Units.
Patuloy namang pinapaalalahanan ng Provincial Health Office ang publiko na sundin ang mga pangunahing hakbang sa kalinisan at pag-iwas sa sakit upang mapanatiling ligtas ang komunidad laban sa anumang banta ng viral infections.
Bilang pag-iingat, nagsasagawa na rin ng health education caravan ang Provincial Health Office katuwang ang mga Rural Health Units sa mga bayan upang ipaliwanag ang nasabing sakit at iba pang paraan ng pag-iwas sa impeksyon.
