Pormal nang lumagda sa isang Memorandum of Agreement (MOA) ang Department of Education (DepEd) at Pamahalaang Panlalawigan ng Romblon at iba pang lalawigan sa bansa para sa pagtatayo ng mga bagong silid-aralan, bilang bahagi ng programa ng pamahalaan na tugunan ang kakulangan sa classrooms sa buong bansa.
Pinangunahan ni Pangulong Ferdinand R. Marcos Jr. ang ceremonial signing ng kasunduan nitong February 11, kung saan kabilang ang mga lalawigan na makikibahagi sa pagpapatupad ng proyekto. Layunin ng unang yugto ng kasunduan na makapagtayo ng humigit-kumulang 4,000 silid-aralan sa buong bansa.
Ayon sa Pangulo, mahalaga ang pakikipagtulungan ng DepEd at mga lokal na pamahalaan upang masigurong magkakaroon ng ligtas at maayos na silid-aralan ang bawat mag-aaral sa bansa.
Sinabi ni Marcos na umaabot sa 145,000 silid-aralan ang kakulangan sa bansa hanggang Disyembre 2025, kaya kinakailangang pabilisin ang pagpapatayo ng mga paaralan sa pamamagitan ng pakikipagtulungan sa mga lokal na pamahalaan.
Sa ilalim ng kasunduan, ang DepEd ang magtatakda ng teknikal na pamantayan, magbibigay ng disenyo at pondo, habang ang mga lokal na pamahalaan ang mangunguna sa procurement at konstruksyon ng mga silid-aralan upang mapabilis ang implementasyon ng proyekto.
Suportado ang programa ng 2026 General Appropriations Act na naglaan ng P85.39 bilyon para sa Basic Education Facilities. Sa unang yugto ng programa, P9.6 bilyon ang inilaan, kung saan P4.1 bilyon ang gagamitin sa pagtatayo ng may 1,200 silid-aralan sa pangunguna ng mga probinsya, at mahigit P5 bilyon naman para sa 2,800 pre-fabricated classrooms na ipatutupad ng DepEd.
Bahagi rin ng programa ang pagpapalakas ng digital connectivity sa mga paaralan, kung saan halos 34,000 pampublikong paaralan na sa bansa ang may internet access sa kasalukuyan.
Inaasahang makatutulong ang kasunduang ito sa pagpapabilis ng pagtatayo ng mga silid-aralan sa Romblon at sa iba pang lalawigan upang matugunan ang kakulangan sa pasilidad at mapabuti ang kalagayan ng pag-aaral ng mga mag-aaral.
