Itinaas na ng Philippine Atmospheric, Geophysical and Astronomical Services Administration (PAGASA) ang Tropical Cyclone Wind Signal No. 1 sa Isla ng Sibuyan, Romblon dahil sa patuloy na banta ng Bagyong Ada na patuloy na nagpapadala ng ulan at malalakas na hangin sa Luzon at ilang bahagi ng Visayas.
Huling namataan ang sentro ng bagyo kaninang alas-10 ng umaga malapit sa Baras, Catanduanes, taglay ang lakas ng hangin na umaabot sa 85 kilometro kada oras malapit sa gitna at bugso na hanggang 115 kilometro kada oras. Kumikilos ito pa-hilagang-kanluran sa bilis na 25 kilometro kada oras.
Dahil ang isla ng Sibuyan ay nasa ilalim na ng Signal No. 1, asahan sa loob ng susunod na 36 oras ang hangin na may bilis na 39 hanggang 61 kilometro kada oras, na maaaring magdulot ng bahagyang pinsala sa mga estrukturang gawa sa light materials.
Ayon sa PAGASA, kahit ang ibang bahagi ng lalawigan ay wala pang nakataas na signal, inaasahan pa rin ang malalakas na bugso ng hangin sa buong Romblon dahil sa lawak ng bagyo at sa epekto ng hanging Amihan.
Ayon sa Romblon Provincial Information Office, ang Pamahalaang Panlalawigan ng Romblon at sa Provincial Disaster Risk Reduction and Management Office (PDRRMO) ay mahigpit nang nagbabantay sa sitwasyon.
Pinayuhan rin nila ang publiko na ihanda ang kanilang emergency kits, i-secure ang mga gamit sa labas ng bahay, at makipag-ugnayan sa kani-kanilang MDRRMO at barangay officials para sa anumang pangangailangan.
