Nanawagan si Romblon Governor Trina Firmalo-Fabic sa Maritime Industry Authority (MARINA) at sa mga shipping lines na magbukas ng direktang rutang magkokonekta sa Sibale Island sa iba pang bahagi ng lalawigan ng Romblon, partikular sa Tablas Island at mainland Romblon, upang mapagaan ang biyahe ng mga residente at pasahero.
Ayon sa gobernador, bukas ang Pamahalaang Panlalawigan na makipagtulungan at magbigay ng subsidiya sa mga shipping company upang maisakatuparan ang biyahe, kabilang na ang posibleng tulong sa gastos sa krudo, kahit magsimula lamang ito sa isa o dalawang biyahe kada linggo.
Sa kasalukuyan, tanging mga bangkang bumibiyahe mula Pinamalayan, Oriental Mindoro ang nagsisilbing koneksyon ng Sibale Island.
Dahil dito, ang mga pasaherong mula sa Romblon ay kinakailangang bumiyahe pa patungong Batangas, tumawid sa Oriental Mindoro, at saka pa lamang makasakay ng pump boat patungong Sibale Island, na nagdudulot ng dagdag na gastos at abala.
Binigyang-diin din ni Firmalo-Fabic na ang Sibale na lamang ang natitirang isla sa lalawigan na wala pang direktang koneksyon sa iba pang bahagi ng Romblon, kaya mahalagang mabigyan ito ng maayos at regular na transportasyon.
Ang Pamahalaang Panlalawigan sa pangunguna ni Governor Fabic ay nakipagpulong sa mga kinatawan ng shipping companies, MARINA, Philippine Ports Authority at Philippine Coast Guard kung saan tinalakay nila ang mga suliranin sa transportasyon sa lalawigan, kabilang ang mga aberyang naranasan tuwing peak season gaya ng Pasko at Bagong Taon, at ang mga posibleng solusyon upang mapabuti ang konektibidad ng mga isla sa Romblon.
