Inanunsiyo ni Romblon Governor Trina Firmalo-Fabic na ipamamahagi na ang mga Barangay Health Kit sa lahat ng 219 na barangay sa lalawigan ng Romblon bilang bahagi ng pagpapalakas ng serbisyong pangkalusugan sa antas-barangay.
Ayon sa gobernador, bawat barangay ay tatanggap ng kumpletong health kit na naglalaman ng dalawang blood pressure apparatus na may stethoscope, isang pulse oximeter, dalawang nebulizer, isang weighing scale, at isang fetal doppler na magagamit sa pagbabantay sa kalagayan ng mga buntis.
Dagdag pa ni Fabic, magsasagawa ang Provincial Health Office ng pagsasanay para sa mga Barangay Health Workers upang matutunan ang tamang paggamit ng fetal doppler at iba pang kagamitang kasama sa health kit.
Nilinaw rin ng gobernador na ang mga kagamitang ipamamahagi ay ilalagay sa pangangalaga ng mga barangay health station, barangay officials, at BHWs, at maaaring magamit ng mga residente ng bawat barangay kapag kinakailangan.
Ayon pa kay Fabic, ang pondo para sa proyekto ay nagmula sa budget ng Office of the Governor, na pinondohan mula sa buwis ng mamamayan.
Bahagi umano ito ng layunin ng pamahalaang panlalawigan na mabigyan ng sapat at maayos na kagamitang medikal ang mga barangay health stations bilang katuwang ng mga ospital at rural health units, upang higit na mapalakas ang serbisyong pangkalusugan at matiyak ang kapakanan ng bawat Romblomanon.
