Magpapatupad ng dagdag-sahod ang Regional Tripartite Wages and Productivity Board (RTWPB) sa rehiyong MIMAROPA simula Enero 1, 2026.
Ito ay matapos aprubahan ng National Wages and Productivity Commission (NWPC) ang Wage Order ng RTWPB MIMAROPA, ayon sa anunsyo nitong Martes.
Batay sa kautusan, itinatakda na sa ₱455 ang bagong daily minimum wage para sa walong oras na trabaho. Tataas ito mula sa dating ₱430 para sa mga establisimyentong may 10 empleyado pataas, at mula naman sa ₱404 para sa mga establisimyentong may mas mababa sa 10 manggagawa.
Sa ilalim ng bagong wage order, iisa na lamang ang minimum wage rate sa buong rehiyon ng MIMAROPA, anuman ang laki ng establisimyento.
Samantala, itinaas din ang minimum wage ng mga kasambahay sa ₱7,000 kada buwan.
Layunin ng wage increase na makatulong sa pagtugon ng mga manggagawa sa patuloy na pagtaas ng gastusin at mapabuti ang kanilang kabuhayan sa rehiyon.
