Matagumpay na naidepensa ng 32-anyos at undefeated na Japanese boxing superstar na si Naoya “The Monster” Inoue ang kanyang undisputed super bantamweight title matapos talunin ang mas batang challenger na si Alan David Picasso ng Mexico. Ang laban ay nagsilbing main event ng “The Ring V: The Night of the Samurai” na ginanap noong December 27, 2025 sa Mohammed Abdo Arena sa Riyadh, Saudi Arabia.
Mula simula hanggang huli ay nagmistulang boxing clinic ang ipinamalas ni Inoue. Bagamat kapwa nag-iingat ang dalawang boksingero sa unang round, tuluyang nakontrol ni Inoue ang takbo ng laban pagsapit ng ikalawang round hanggang sa huli. Ipinakita niya ang kanyang bilis ng kamay, husay sa footwork, at eksaktong kombinasyon na siyang naging dahilan ng hirap ni Picasso na makasabay. Habang may ilang suntok na tumatama ang Mexican challenger, paisa-isa lamang ang mga ito at hindi sapat upang basagin ang solidong depensa ni Inoue.
Hindi man napabagsak si Picasso, malinaw ang naging dominasyon ni Inoue na nagresulta sa unanimous decision victory sa scorecards na 119–109, 120–108, at 117–111.
Dahil sa panalong ito, naitala ni Inoue ang kanyang ikaapat na panalo ngayong 2025 at ang kanyang ika-27 sunod na panalo sa title fights, na tumabla sa rekord ng boxing legend na si Larry Holmes. Sa kasalukuyan, hawak ni Inoue ang perpektong rekord na 32 panalo, 0 talo, at 27 knockouts, habang bumagsak naman si Picasso sa 32 panalo, 1 talo, 1 draw, at 17 knockouts.
Samantala, sa co-main event, nakuha rin ng Japanese boxer na si Junto Nakatani ang panalo laban kay Sebastian Hernandez ng Mexico. Bago ang laban ay parehong undefeated ang dalawang boksingero, kung saan may rekord si Nakatani na 32–0 (24 KOs) habang 20–0 (18 KOs) naman si Hernandez.
Malinaw na kontrolado ni Nakatani ang unang anim na rounds gamit ang kanyang footwork at malilinis na kombinasyon. Gayunman, sa ikapitong round hanggang sa huli ay naging agresibo si Hernandez, patuloy na sumusugod at nakapagbigay ng matitinding suntok na nagdulot pa ng pamamaga at halos pagsara ng isang mata ni Nakatani. Ito ang kauna-unahang pagkakataon na nakita ang Japanese fighter na seryosong napahirapan sa loob ng ring, lalo’t ito rin ang kanyang unang laban sa super bantamweight division matapos umangat ng timbang.
Sa kabila nito, ibinigay pa rin ng mga hurado ang panalo kay Nakatani sa pamamagitan ng unanimous decision na may iskor na 115–113, 115–113, at 118–110.
Dahil sa parehong panalo nina Inoue at Nakatani, lalong umigting ang usap-usapan hinggil sa isang all-Japanese mega showdown sa pagitan ng dalawa. Ayon sa mga ulat, posibleng mangyari ang laban sa May 3, 2026 sa Tokyo Dome. Matagal nang inaasam ng mga boxing fans ang paghaharap nina Inoue at Nakatani, at ngayong pareho na silang nasa iisang dibisyon, tila mas malapit na itong maging realidad—bagamat nananatiling bukas ang parehong kampo sa iba pang mga posibleng laban.
